ԱՐԴՅՈՒՆԱՎԵ՞Տ Է ԾԱԽՍՎՈՒՄ ՎԱՐԿԸ
ԱԺ վերահսկիչ պալատի հաշվետվության մասին քաղաքական քննարկումներն
ընթացան՝ առանց անդրադառնալու բուն նյութին, թե ի վերջո ի՞նչ էր պարզել այս
կառույցը: Ուշացումով լրացնում ենք այս բացը, մեջբերելով ՀԲ-ի տրամադրած
վարկի հաշվին՝ դատարանների շինարարության ընթացքում բացահայտված որոշ թերությունների
մասին տվյալներ: Ըստ հաշվետվության՝ Արաբկիր եւ Քանաքեռ-Զեյթուն համայնքների
դատարանի շենքի շինարարության ընթացքում արձանագրվել են իրարամերժ տվյալների
առկայության բազմաթիվ փաստեր: 2002-ին պայմանագիր էր կնքվել «Արբեքս» ընկերության
հետ, որը շինարարությունը պիտի իրականացներ 430280 դոլարով, 2003-ի հոկտեմբերին
պայմանագիրը խզվել է, եւ նոր պայմանագիր կնքվել 2004-ի ապրիլին: Նոր պայմանագրի
արժեքն արդեն 847300 դոլար է: Ավելին՝ «Արբեքսի» կողմից այս դատարանի շենքի
հողային աշխատանքները կատարելիս վթարային է դարձել հարեւանությամբ գտնվող
Ներսիսյան 12 բնակելի շենքը, եւ վարկային միջոցներից 7161 դոլար վճարվել
է դրա ամրացման համար:
Աշտարակի դատարանի շենքի շինարարությունը պայմանագրով պիտի ավարտվեր 2002-ի նոյեմբերին: Սակայն ԱԺ ՎՊ-ի վերահսկողության ավարտին դեռեւս ավարտված չէին աշխատանքները, սակայն չէին կիրառվել ժամկետի խախտման համար պայմանագրով նախատեսված տույժերը՝ օրը 0,1%:
Ծրագրով նախատեսված 4 տարվանից վերահսկողության պահին անցել էր 2,5 տարի, սակայն նախատեսված 20 դատարանի շենքերից ավարտված էին միայն 2-ը, եւ սկսվել էին եւս 9-ի աշխատանքները: Վանաձորի դատարանի շենքը պետք է պատրաստ լիներ 2003-ի սեպտեմբերին, սակայն 2004-ի մայիսի 1-ին իրականացված էր աշխատանքների ընդամենը 80%-ը: Գյումրիի դատարանի շենքը պետք է պատրաստ լիներ 2004-ի հոկտեմբերին, սակայն մայիսի 1-ի դրությամբ կատարված էր աշխատանքների միայն 30%-ը: Աջափնյակ եւ Դավիթաշեն համայնքների դատարանի շենքի շինարարությունը պետք է ավարտված լիներ 2004-ի հունիսին, սակայն մեկ ամիս առաջ կատարված էր աշխատանքների ընդամենը 35%-ը:
Այս ամենը բնավ չեն վկայում Դատաիրավական բարեփոխումների վարկային ծրագրի միջոցների արդյունավետ օգտագործման մասին:
Սեփ. լր.
