Էլինան մեդալի հավակնորդների մեջ է

Դրեզդենում շախմատի Եվրոպայի տղամարդկանց եւ կանանց անհատական 8-րդ առաջնությունում Հայաստանի ներկայացուցիչ, գրոսմայստեր Էլինա Դանիելյանը կայուն ու բարձրակարգ խաղ է ցույց տալիս:

Ութերորդ տուրում Էլինան սեւերով հանդիպեց Եվրոպայի առայժմ գործող չեմպիոն, ծագումով ռուս Եկատերինա Աթալիկի հետ (նա վերջին երկու տարիներին հանդես է գալիս Թուրքիայի դրոշի ներքո) եւ ոչ-ոքի գրանցելով՝ 6,0 միավորով բաժանում է 3-9-րդ հորիզոնականները: Կանանց մրցաշարային աղյուսակը 7,5 միավորով միանձնյա գլխավորում է ռուսաստանցի Տատյանա Կոսինցեւան, ով այս ամբողջ ընթացքում կորցրել է ընդամենը կես միավոր եւ արդեն գրեթե վստահաբար կարելի է ասել, որ իր համար ապահովել է Եվրոպայի չեմպիոնի կոչումը: Երկրորդ տեղում Տատյանայի քույրն է՝ Նադեժդա Կոսինցեւան՝ 6,5 միավորով: Եթե մնացած երեք տուրերում Է. Դանիելյանը շարունակի հանդես գալ նույնպիսի վերելքով, ապա մեդալի հավակնելու ռեալ հեռանկար կունենա:

Նույն օրը Լիլիթ Մկրտչյանը միավորը բաժանեց Վերա Յուրգենսի հետ, իսկ Սիրանուշ Անդրիասյանը պարտվեց Սաբինա-Ֆրանսիսկա Ֆուզորին: Ութ տուրից հետո Լիլիթը 4,5 միավորով 54-րդն է, իսկ Սիրանուշը՝ 78-րդը (4,0):

Ութերորդ տուրում մեր տղաներից հաղթանակ տարան Հայաստանի ինը ներկայացուցիչներից հինգը՝ Տիգրան Լ. Պետրոսյանը, Արտաշես Մինասյանը, Զավեն Անդրիասյանը, Տիգրան Քոթանջյանը եւ Աշոտ Անաստասյանը: Հերթական ոչ-ոքին գրանցեց Գաբրիել Սարգսյանը: Կարեն Ասրյանը նույնպես իր անվան դիմաց կես միավոր ավելացրեց: Իսկ ահա Ռաֆայել Վահանյանն ու Արման Փաշիկյանը պարտվեցին: Իններորդ տուրից առաջ մեր գրոսմայստերները մրցաշարային աղյուսակում 403 մասնակիցների մեջ դասավորվել էին այսպիսի հաջորդականությամբ:

27. Տիգրան Լ. Պետրոսյան 5,5 միավոր

33. Արտաշես Մինասյան 5,5

80. Զավեն Անդրիասյան 5,0

145. Գաբրիել Սարգսյան 4,5

146. Արման Փաշիկյան 4,5

157. Տիգրան Քոթանջյան 4,5

180. Աշոտ Անաստասյան 4,5

183. Ռաֆայել Վահանյան 4,0

227. Կարեն Ասրյան 4,0