![\"\"](\"https://www.aravot.am/2007/aravot_arm/July/6/p2.jpg\")
Ալ. Սպենդիարյանի անվան օպերայի եւ բալետի ազգային ակադեմիական թատրոնում բեմադրվող «Նորմայի» մասին ասում է հրավիրված դիրիժորը:
Հուլիսի 7-ին Ազգային օպերային թատրոնը կներկայանա Բելինիի «Նորմայով»: Այդ առիթով Հայաստանում է ամերիկահայ դիրիժոր Ռիչարդ Ասլանյանը:
2 տարի առաջ էլ ԱՄՆ-ի Տեխաս նահանգի Վաքոյի Լիրիկ օպերայի գեղարվեստական ղեկավար եւ դիրիժոր Ռիչարդ Ասլանյանը «Տրավիատայի» իր մեկնաբանությամբ է հանդես եկել մեր օպերային թատրոնում։
Տեղեկացնենք, որ նա ղեկավարել է շուրջ 50 օպերային թատրոնների նվագախմբեր, աշխատել է նաեւ Միլվոկիի, «Բլումինգտոն», «Շըմփեյն-Ուրբանա», Նյու Ջերսիի սիմֆոնիկ նվագախմբերի, «Ռեյնալդ» կամերայինի եւ Ռոչեստերի ֆիլհարմոնիկի հետ:
Դիրիժորից հետաքրքրվեցինք՝ ինչպե՞ս է սկսվել համագործակցությունը Երեւանի օպերային թատրոնի հետ: Պրն Ասլանյանը տեղեկացրեց, որ 2 տարի առաջ նամակ էր գրել օպերային թատրոնի գլխավոր դիրիժոր
Կարեն Դուրգարյանին եւ օպերայում հյուրընկալվելու ցանկություն հայտնել: Այնուհետեւ ստացել էր դրական պատասխան եւ հրավիրվել էր «Տրավիատան» ղեկավարելու: Ռ. Ասլանյանը տեղեկացրեց, որ Հայաստան գալու հիմնական պատճառը տիգրանակերտցի հոր ջերմիկ պատմություններն էին հայրենիքի մասին եւ տատից ու պապից սովորած հայերեն բառերը: «Գիտեի, որ Հայաստանում մի հրաշալի թատրոն կա՝ տաղանդավոր արվեստագետներով: Շատ երջանիկ եմ, որ Կարեն Դուրգարյանն առաջարկել է «Նորմայի» առիթով էլ համագործակցել: Դուք հրաշալի երգիչներ ունեք, ընտիր նվագախումբ ու երգչախումբ: Կարծում եմ, որ Երեւանի օպերային թատրոնը ֆինանսական ավելի մեծ միջոցների ու հոգածության է արժանի: Զարմանում եմ, որ չնչին գումարներով այստեղ կարողանում են այնպիսի ներկայացումներ բեմադրել, որոնք որակով չեն զիջում դրսի «արտադրանքին»: Օպերային արվեստը ֆինանսատար է: Արտերկրի թատրոններում մեծ փողեր են «պտտվում», բայց այնտեղ էլ հաճախ լավ երգիչներն են դեֆիցիտ»,- հայտնեց ամերիկահայ արվեստագետը:
Մեր հարցին՝ ուրիշ ի՞նչ օպերային թատրոնների հետ է համագործակցել «Նորմայի» «մասով», օպերա, որը հաճախ չի բեմադրվում, պրն Ասլանյանը պատասխանեց. «Այո, իսկապես, «Նորման» հազվադեպ բեմադրվող բարդ օպերա է: Առաջին անգամ ձեր թատրոնում եմ աշխատելու այս օպերայի վրա: Նորմայի դերերգի «տիրոջ»՝ Մագդա Մկրտչյանի համար էլ սա առաջին կատարումն է»:
Դիրիժորը շեշտեց, որ իր հայաստանյան այցը ամենեւին կապ չունի «Նորման» բեմադրած Բորիս Հայրապետյանի հետ, որը նույնպես վերջերս Հայաստանում էր: Պրն Ասլանյանն ասաց, որ կուզենար հայ երաժիշտների հետ համագործակցել նաեւ արտերկրում, սակայն վիզային խնդիրների պատճառով համատեղ ձեռնարկները ոչ միշտ կարելի է իրագործել: Օրինակ, անցյալ տարի ցանկացել է իր հետ ԱՄՆ տանել ալտահար Վաչե Հովեյանին, սակայն նույն պատճառով ամեն ինչ ձախողվել է: Դառնալով «Նորմային»՝ Ռիչարդ Ասլանյանը հարցազրույցի վերջում հավելեց, որ մեծ սպասելիքներ ունի. «Ուզում եմ, որ մաքուր ու ազնիվ ներկայացում լինի»:
