Ռուբեն Ռշտունին հավաստիացնում է, որ «10-ի գործով» հուլիսի 13-ի դատական նիստին հաստատապես կներկայանա դատարան:
Ինչպես եւ սպասվում էր, Հայաստանի մաքսային պետական կոմիտեի նախկին ղեկավար Արմեն Ավետիսյանի տան վրա ավազակային հարձակման գործով երեկ նշանակված նիստը տեղի չունեցավ: Հիշեցնենք, որ նախօրեի դատական նիստին ամբաստանյալ Հայկ Մելքոնյանի պաշտպան Ռուբեն Ռշտունին տեղեկացրել էր, որ տեւական բուժում է ստանում եւ չի կարող ներկայանալ հուլիսի 6-ի եւ 7-ի նիստերին: Դատարանը առաջարկել էր ամբաստանյալին՝ հրավիրել մեկ այլ պաշտպան, ամբաստանյալը համաձայնել էր Ռ. Ռշտունուն զուգահեռ՝ գործում ներգրավել եւ մեկ պաշտպանի:
Երեկվա դատական նիստին, սակայն, նոր պաշտպան չներկայացավ, ամբաստանյալի հարազատները չէին հասցրել մեկ օրում ապահովել նրա ներկայությունը: Իսկ պաշտպան Ռուբեն Ռշտունին էլ նոր գրությամբ դատարանին տեղեկացրել էր, թե հուլիսի 13-ի դատական նիստին հաստատապես ներկայանալու է դատարան: Այնուամենայնիվ, գործով նախագահող Մնացական Մարտիրոսյանը զգուշացրեց ամբաստանյալին, որ Ռ. Ռշտունու չներկայանալու դեպքում կկասեցվեն պաշտպանի լիազորությունները եւ դատարանի կողմից կնշանակվի նոր պաշտպան:
Դատարանը, հիմնվելով Հանրային պաշտպանի գրասենյակի որոշման վրա՝ ճանաչեց ամբաստանյալ Նիկոլայ Խաչիկյանի պաշտպան Հայկ Իսրայելյանի լիազորությունները նաեւ ամբաստանյալ Աշոտ Խաչատրյանի շահերը պաշտպանելու հարցում: Վերջինիս պաշտպան Կարո Աղաջանյանը գտնվում է արձակուրդում. ըստ Հանրային պաշտպանի գրասենյակի որոշման, երկու վերոհիշյալ ամբաստանյալների շահերի միջեւ հակասություններ չկան, ուստի նրանց երկուսի շահերը կարող է պաշտպանել միեւնույն փաստաբանը:
