Հայաստանում կեղծ եւ ժամկետանց դեղերի շրջանառությունը կազմում է շուկայի ընդամենը 1-2.5 %-ը: Այսօր այս մասին «Հենարան» ակումբում ասուլիսի ժամանակ հայտնել է Հայաստանի դեղարտադրողների եւ ներմուծողների միության տնօրեն Սամվել Զաքարյանը: Նա բացատրել է, որ ժամկետանց դեղերը շուկայում հայտնվում են երբեմն այն պատճառով, որ դեղատան աշխատակիցները կեղծում են դեղերի ժամկետները: Ըստ նրա, եթե ինչ-որ մեկը իր ավտոտնակում որոշում է կավիճից դեղ պատրաստել եւ ծանոթների միջոցով տարածել, դա իր գործն է. «Նման աշխատանքով զբաղվողները պատժվում են: Բայց մեկ այլ խնդիր է, երբ մարդիկ Վրաստանից պայուսակներում ու գրպաններում լիքը լցրած դեղեր են բերում: Սրա պատճառն այն է, որ ի տարբերություն Հայաստանի, Վրաստանում ավելացված հարկի 20 տոկոսը չի կիրառվում»: Անդրադառնալով դեղահաբերից թունավորումներին, նա ասել է, որ երբ ինչ-որ մեկը հուսահատությունից մեծ քանակությամբ դեղ է խմում, որ, ասենք՝ ինքնասպան լինի, ապա չի կարելի ասել, որ նրա մոտ դեղային թունավորում է եղել: Հայաստանի դեղարտադրողների եւ ներմուծողների միությունը ժամկետանց դեղերից թունավորումների մասին տեղեկանալու եւ դրանք հետագայում կանխելու համար այսուհետ կազմակերպելու է մոնիտորինգներ, որի արդյունքները կներկայացվեն 2012-ի հունվարին:
Անուշ ԽԵՉՈՅԱՆ
