Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանն այսօր ժ.14.00-ին սկսեց Արման Հայրապետյանի, Սարգիս Ավագյանի, Արսեն Խաչատրյանի եւ Արմեն Պետրոսյանի դեմ հարուցված քրեական գործի դատաքննությունը:
Նա ճշտեց մեղադրյալների ինքնությունը: Պարզվեց, որ Արմանը բանվոր է եղել, Սարգիսը «Նաիրիտ» փակ բաժնետիրական ընկերությունում՝ «ապարատավար», Արտակը՝ սրճարանի մենեջեր, իսկ Արմենը որեւէ տեղ չաշխատելով՝ հայտնեց, թե խնամքի տակ է մայրը:
Նախագահողը յուրաքանչյուրի ինքնությունը ճշտելիս հարցնում էր. «Պատգամավո՞ր եք, որեւէ կուսակցության անդա՞մ»: Պարզվեց, որ 4-ից որեւէ մեկը պատգամավոր չէր, իսկ Սարգիս Ավագյանը «Բարգավաճ Հայաստան» կուսակցության անդամ էր: Դատավորի հարցին, թե որտե՞ղ է նրա անդամատոմսը, Սարգիսը, որի խափանման միջոցը ստորագրությունն է քաղաքից չբացակայելու մասին, հայտնեց, թե՝ տանն է, չի բերել:
Մեղադրյալների իրավունքները բացատրելուց եւ դատարանի ու դատավորի նկատմամբ դիրքորոշումները ստուգելուց հետո ամբաստանյալ Արմեն Հայրապետյանի պաշտպանը միջնորդեց, որ դատաքննությունը հետաձգվի, քանի որ նրանք պետք է քննարկեին արագացված դատաքննության կարգով դատաքննության հարցը: Ի դեպ, միայն Սարգիս Ավագյանը պաշտպան չունի եւ եթե դատարանը որոշի, որ արագացված դատաքննություն պետք է ընթանա, ապա անհրաժեշտ կլինի պաշտպանի մասնակցությունը:
Կարդացեք նաև
Կենտրոն վարչական տարածքի դատախազի տեղակալ Արմեն Աֆանդյանը մեղադրական եզրակացությունը հաստատելիս՝ դեմ է եղել արագացված դատաքննությանը, սակայն չբացառեց, որ իր դիրքորոշումը կփոխվի: Դատական նիստը հետաձգվեց:
Հիշեցնենք, որ քառյակն այս տարվա հունիսի 19-ին, ժ.03.30-ի սահմաններում, Երեւանի Աբովյան փողոցում գտնվող «Կրիստալ» գիշերային ակումբում «դեբոշներ» էին արել, ըստ գործի նյութերի կատարել էին խուլիգանություն՝ «որպես զենք օգտագործվող առարկայի գործադրմամբ»:
Ամբաստանյալները չէին ընդունել իրենց առաջադրված մեղադրանքը:
Տուժողները 4-ն են. Թեհմինե Սողոմոնյանը, Մանվել Գալստյանը, Արարատ Պետրոսյանն ու Անդրանիկ Մարտիրոսյանը:
Ռուզան ՄԻՆԱՍՅԱՆ
