Չիլիի «Մեր ժառանգությունը» հասարակական բնապահպանական-հնագիտական կազմակերպությունը պաշտոնապես դիմել է դատարան՝ պահանջելով հնագիտական պեղումների տարածքները պաշտպանել «Դաքար» ավտոռալիի ավերիչ ներգործությունից:
Դիմումի հեղինակները համոզված են, որ մարաթոնյան ավտոարշավի մասնակիցներն անվերադառնալի կորուստ են հասցնում երկրի պատմամշակութային ժառանգությանը: Բողոքում ասվում է, թե աբսուրդ է այն, որ կառավարությունը հսկայական միջոցներ է ծախսում ազգային պատմամշակութային արժեքները ոչնչացնելու համար, որի հիմնական օջախ դարձել է երկրի հյուսիսում գտնվող Ատակամա անապատը:
Այնտեղ միայն 2009 թվականին ավերվել է հնագիտական վեց տարածք, որտեղ հայտնաբերված գտածոների տարիքը գերազանցում է չորս հազար տարին: Դրա հաջորդ տարին ոչնչացվել է այդպիսի՝ 52, իսկ 2011 թվականին՝ 126 ազգային ժառանգության տարածք:
Մասնագետների գնահատմամբ համարժեք վնաս հասցվել է նաեւ Արգենտինային: Նոր «Դաքարի» մրցուղին առաջին անգամ անցնելու է նաեւ Պերույով, մասնավորապես, Արեկիպա եւ Պիսկո քաղաքներով, որոնք նույնպես հայտնի են հնէաբանական գտածոներով:
Կարդացեք նաև
Աշոտ ՀԱԿՈԲՅԱՆ
