Հայկական զինված ուժերում յուրաքանչյուր զինվորի մահվան դեպք լուրջ քննարկման առարկա է դառնում ԵԱՀԿ անդամ բոլոր երկրներում: Այս մասին Aravot.am-ի հետ զրույցում ասաց իրավապաշտպան Արթուր Սաքունցը:
Նրա խոսքերով. «Լուրջ հարցադրումներ են ներկայացնում մեր իշխանություններին ու յուրաքանչյուր սպանության , մահացության դեպք մնում է օրակարգում»:
Պարոն Սաքունցի խոսքերով, բանակում տեղի ունեցող մահացության դեպքերի մասով մտահոգություն է հայտնել նաեւ Եվրոպայի խորհրդի մարդու իրավունքների հանձնակատար Թոմաս Համմարբերգը . «Նա անհանգստացած է մահացության դեպքերի փաստերի եւ ոչ պատշաճ քննության վերաբերյալ: Ամենայն հավանականությամբ, մինչեւ գարուն՝ նրա պաշտոնավարության լրանալը, հանձնակատարը քննարկումներ կկազմակերպի»:
Իրավապաշտպանն ասաց, որ 2010-ի համեմատ՝ 2011-ին աճել է բանակում մահացության դեպքերի թիվը. «Պայքարի բոլոր մեթոդներն անարդյունավետ են, չկա իրական վերահսկողություն: Մինչեւ հիմա չեն հաստատել կարգապահական կանոնագիրք : Չկա իրավական նորմ, որով արգելեն հանցագործներին պատիժը կրելուց հետո բանակում ծառայել: Մեր բանակում ծառայող շատ հանցագործներ իրենց հետ վատ մշակույթ, սովորություններ են տանում»:
Կարդացեք նաև
Պարոն Սաքունցը նշեց նաեւ, որ մահացության դեպքերին վերաբերող դատական գործերն էլ հիմնականում տարիներով երկարում են, ու քիչ թվով գործեր են հասնում Մարդու իրավունքների եվրոպական դատարան. «Մարդիկ առաջին ատյանի վճռից հետո նույնիսկ վերաքննիչ չեն դիմում, հուսահատված հետ են կանգնում: Շատ գործեր էլ նույնիսկ առաջին ատյան չեն մտնում, որովհետեւ միայն նախաքննությունն ավարտելու համար է տարիներ հարկավոր, օրինակ՝ 2010 թվականի հուլիսին Մարտունու դեպքի նախաքննությունը դեռ չի ավարտվել»:
Արփինե ՍԻՄՈՆՅԱՆ
