Ինչպես արդեն տեղեկացրել էինք, ՀՀ զինված ուժերի 20-ամյակի օրը, մոմերով լուռ երթ էր կազմակերպվել ի հիշատակ բանակում տարբեր հանգամանքերում սպանված զինծառայողների: Երթը սկսվեց Ազատության հրապարակից, որտեղից զոհվածների հարազատները եւ պարզապես մտահոգ քաղաքացիներ` մոտ հարյուր հոգի, մոմերով շարժվեցին դեպի Հյուսիսային պողոտա եւ լուռ երթով հասան Հանրապետության հրապարակ: Ազատության հրապարակում նույն ժամին հավաքվածների մի մասը շտապում էր տոն օրվան նվիրված համերգին: Երթի մասնակիցները թռուցիկներ էին բաժանում, իսկ անցորդ երիտասարդներից շատերի հայացքներն անտարբեր էին. հայկական բանակի ապագա զինվորներից մի քանիսը շտապում էին մոտակա բարը, տեսնելով զոհվածների նկարներով անցնող երթի մասնակիցներին, այսպես արձագանքեցին` «Բան ու գործ չունեն»:
«Այսօր մեր բանակի 20-ամյակն է, այս երիտասարդները, ում նկարները, որ տեսնում եք, 20 տարին դեռ չլրացած, զոհվեցին, եւ խաղաղ պայմաններում զոհված երեխաների մահվան հանգամանքների համար ոչ մեկը ոչ մի պատասխանատվություն չի կրում: Դրա համար այսօր նախընտրում եմ այստեղ գտնվելը, քան որեւիցե համերգասրահում կամ այլ տեղ լինել»,- Aravot.am-ին ասաց երթի մասնակից Աստղիկ Աղեկյանը:
2007թ. օգոստոսի 30-ին մահացած ժամկետային զինծառայող Տիգրան Օհանջանյանի մայրը` Գոհար Սարգսյանը, առանց արցունքների խոսել չի կարողանում. զոհվածների ծնողների ցանկությունը մեկն է` բացահայտել մեղավորներին եւ պատժել: Ծնողներն արձագանքեցին զինդատախազ Գեւորգ Կոստանյանի` վերջերս ասուլիսում արած հայտարարություններին:
Կարդացեք նաև
Aravot.am-ի զրույցը Տիգրան Օհանջանյանի ծնողի ու 2010 թվականին ԼՂՀ Հայկազովի զորամասում մահացած Վալերի Մուրադյանի մոր` Նանա Մուրադյանի հետ` շուտով:
Լուսինե ԽԱՉԱՏՐՅԱՆ
