«Մենք ենք քաղաքի տերը» նախաձեռնության անդամները Մաշտոցի այգին պահպանման համար չեն դադարելու պայքարել: «Մաշտոցի այգին պետք է նորից դառնա հանգստի, ոչ թե առեւտրի գոտի»,- կարծում է «Մեր քաղաքը» նախաձեռնության անդամ Գրիգոր Ղազարյանը:
«Քաղաքապետարանի հիմնավորումը մեզ համար անհիմն է: Իրենց մատնանշած Երեւանի նույն գոտեւորման նախագծով այս տարածքը կանաչ գոտի է: Իրենց հայտարարության մեջ կար նաեւ «Հին Երեւան» նախագծի մասին հիշատակում: Դրա շրջանակում որեւէ շինարարություն սկսելն անօրինական է, քանի որ որեւէ հանրային քննարկման չդրված նախագիծ է»,- Aravot.am-ի հետ զրույցում ասաց նախաձեռնության անդամ Գայանե Մելքոմյանը` մեր խնդրանքով անդրադառնալով քաղաքապետարանի օրերս ներկայացրած պարզաբանմանը: Նա նշեց, որ իրենք արդեն պաշտոնական գրությամբ դիմել են քաղաքապետարան: Վերջինս պետք է հնգօրյա ժամկետում ներկայացնի մատնանշած փաստաթղթերը:
Ինչ վերաբերում է որոշ մարդկանց բերած հակափաստարկին, թե այդ այգին վաղուց դադարել էր զբոսայգի լինելուց եւ դարձել աղբավայր, Գ. Մելքոմյանն այսպես արձագանքեց. «Մեր մոտեցումը հետեւյալն է, անգամ եթե մեկ ծառ կտրվում է, կա ծառ, թե ոչ, գոյություն ունի օրենք, այդ տարածքը նախատեսված է լինել զբոսայգի: Եթե այգին վատ վիճակում է, հարցի բոլորովին այլ կողմն է եւ այն, որ այգին անբարեկարգ վիճակում է, բոլորովին հիմք չի կառուցելու ոչ նպատակային նշանակության շինություններ»:
Ի դեպ, հիշեցնենք նաեւ, որ նույն երիտասարդները այգու վերակենդանացման համար դեռ նախորդ տարվա ամռանը մի շարք ակցիաներ իրականացրեցին, սակայն վիճակը գրեթե նույնը մնաց:
Կարդացեք նաև
Լուսինե ԽԱՉԱՏՐՅԱՆ