Այսօր վաղ առավոտից մինչև ուշ երեկո ճանաչողական այցով Գյումրիում էր ՀՀ ոստիկանապետ Վովա Գասպարյանը: Նրա պատվին բավականին մեծ պատրաստություն էին տեսել . չնայած սառնամանիքին` շեֆին հավուր պատշաճի դիմավորելու համար շարքային ոստիկաններին շարել էին քաղաքի կենտրոնից մինչև Շիրակի մարզային ոստիկանության մուտքի մոտ:
Նշենք, որ սա ոստիկանապետի այդ պաշտոնում առաջին այցն էր Շիրակի մարզ: Նա գալուն պես փակ խորհրդակցություն է անցկացրել Շիրակի մարզային ոստիկանությունում, ինչպես հավաստում են երեք տարբեր աղբյուրներ, մասնավորապես, խոսել է ընտրաթեմայով, քննարկել յուրաքանչյուր ընտրատարածքում ոստիկանների անելիքների մասին ` կոչ է արել անվախ, «դուխով» պայքարել կրիմինալի դեմ, նրանց չթույլատրել լավ զգալ ընտրատեղամասերում:
Այնուհետ ոստիկանապետը պարգևատրել է իր ենթականերից մի քանիսին, ոտքի վրա բարձրացրել է Շիրակի մարզային ոստիկանության հետաքննության բաժնի պետ Արսեն Հակոբյանի պաշտոնը` նրան նշանակելով Ախուրյանի կադրերի գծով փոխոստիկանապետ, փոխգնդապետի կոչում է շնորհել 2-րդ քաղմասի պետ Արամ Ղարիբյանին, և պարգևատրել է Անի թաղամասի փոխոստիկանապետին:
Հետաքրքիր մի միջադեպ է տեղի ունեցել. ի սկզբանե ոստիկանապետի այցի մասին լրագրողներին տեղյակ չէին պահել` ամենայն հավանականությամբ չցանկանալով, որ ԶԼՄ-ների ականջը հասնի այս կամ այն թեկնածուին սատար կանգնելու մասին փակ խոսակցությունները, սակայն ԳԱԼԱ հեռուստաընկերությունը այդուհանդերձ որոշել է գնալ ու հանդիպել ոստիկանապետին: Ինչպես aravot.am-ին պատմեցին այս հեռուստաընկերության նկարահանող խմբի անդամները, սկզբում իրենց դուրս են հրավիրել` ասելով, որ փակ խորհրդակցություն է ու վերջ չունի, այսինքն հասկացրել են, որ անիմատ են սպասում, սակայն 1 ժամ անց նույն ոստիկանները զանգահարել են հեռուստաստուդիա ու Վովա Գասպարյանի անունից հրավիրել են հարցազրույցի:
Կարդացեք նաև
Ոստիկանապետը նկարահանող խմբից հետաքրքրվել է , թե ով է իրենց դուրս հրավիրել ու բացառիկ հարցազրույց է տվել ԳԱԼԱ-ին, որտեղ ըստ էության հասատատել է aravot.am-ի երեկ հրապարակած այն տեղեկատվությունը, որ Վովա Գասպարյանը գալու է գյումրեցի ոստիկաններին ընտրությունների նախաշեմին «դուխ տալու»: « Իհարկե ոստիկանապետը եկել է դուխ տալու, ոստիկանապետի ուղղակի պարտականությունն է ոգևորել անձնակազմին և խոսքով, և գործով , և իր սեփական օրինակով: Իհարկե ես եկել եմ նաև, որ ընտրությունների համար խոսեմ, որովհետև դա ոստիկանության ամենակարևոր գործառույթն է լինելու մի քանի ամիսից, մենք 37 համայնքներում ունեցանք ընտրություններ, և ոստիկանությունը իր առաջին քննությունը հանձնեց, ոստիկանությունը չունեցավ ոչ մի արտակարգ իրավիճակ, իհարկե ինձ մտահոգւոմ են ընտրությունները և համոզված եղեք` մայիսին ավելի լավ ենք պատրաստված լինելու ընտրություններին, բոլոր պայմանավորվածությունները ձեռք ենք բերել » -ԳԱԼԱ հեռուստաընկերության եթերով հայտնում էր ոստիկանապետը` ժողովրդին էլ համոզելով, որ ամեն ինչ անելու են, որ հայ ոստիկանի մեջ ոչ թե ահ ու սարսափ տեսնեն, այլ` հասարակության պահապանի, նույնիսկ համազգեստն ու ոստիկանի էությունն են համահունչ դարձնելու,փոխելու են զինանշանը` դարձնելով աղավնու տեսքով, որը կխորհրդանշի հին Կիլիկո Ավետարանի սուրբ հոգին:
Նունե ԱՐԵՎՇԱՏՅԱՆ
