Այն բանից հետո, երբ այսօր հայտնի դարձավ, որ Ֆրանսիայի Սահմանադրական խորհուրդը հակասահմանադրական ճանաչեց Հայոց ցեղասպանության ժխտումը քրեականացնող օրինագիծը, Ֆրանսիայի նախագահ Նիկոլա Սարկոզիի գրասենյակը հանդես եկավ հայտարարությամբ, որում նշվել է. «Հանրապետության նախագահը համարում է, որ Ցեղասպանության ուրացումը անհանդուրժելի է եւ հետեւաբար պետք է պատժվի։ Նա խնդրել է կառավարությանը պատրաստել օրենքի նոր նախագիծ՝ հաշվի առնելով Սահմանադրական խորհրդի որոշումը»։ Այս մասին տեղեկանում ենք bbc.co.uk-ից:
Նույն աղբյուրը նաեւ տեղեկացնում է, որ իր հերթին Թուրքիայի արտգործնախարար Ահմեդ Դավութօղլուն արդեն հասցրել է հայտարարել, որ թուրքական կառավարությունը նիստ կհրավիրի` Ֆրանսիայի հետ ռազմաքաղաքական, տնտեսական եւ այլ հարաբերությունների ապասառեցման մասին քննարկելու համար: Հիշեցնենք, որ ֆրանս-թուրքական հարաբերություններում սահմանափակումները դրվել էին այն բանից հետո, երբ հունվարի 23-ին Ֆրանսիայի Սենատը հաստատեց Հայոց ցեղասպանության ժխտումը քրեականացնող օրինագիծը:
