«Երանի գա այն ժամանակը, որ մեր նախագահը ձեռք կխփի սեղանին ու կասի, հերիք եղավ թուրք շներ», – Aravot.am-ի հետ զրույցում ասաց քանդակագործ Լեւոն Թոքմաջյանը:
Նրա կարծիքով, Հայաստանի վարած արտաքին թույլ քաղաքականության պատճառով է, որ ադրբեջանցիներին վերջերս հաջողվեց Կանադայի քաղաքապետին համոզել՝ Արցախի Նախիջևանի գյուղի մոտ 600 մարդու սպանությունը հայ-ադրբեջանական հակամարտության համատեքստում համարել որպես Խոջալուի ցեղասպանություն. «Եվ հիմա այնտեղի փոքրաթիվ հայերը պիտի գնան ու ապացուցեն, եթե դու Խոջալու ես ընդունում, ինչո՞ւ Սումգայիթը չես ընդունում, որն ավելի խայտառակ է եղել: Այ սրան մենք չենք հասնում, մենք մի տեսակ երեւույթը զգում ենք, տեսնում, հետո միայն ձայն բարձրացնում, միշտ զոհի դերում ենք: Չենք կարողանում ճկուն լինել, մի օրվա ընթացքում Դավութօղլուն փնովեց Ֆրանսիային, հենց սահմանադրական խորհուրդը ցեղասպանության մասին օրինագիծը համարեց հակասահմանադրական՝ հաջորդ օրը Դավութօղլուն ասեց բրավո մեր ֆրանսիացի ընկերներին: Մինչեւ ե՞րբ պիտի զոհ դառնանք թուրքական դիվանագիտությանը»:
Նրա խոսքերով, ի տարբերություն Ադրբեջանի ու Թուրքիայի կոշտ հայտարարությունների, Հայաստանը միշտ լղոզիչ, փափուկ, դիմացինին չվիրավորող հայտարարություններով է հանդես գալիս. «Միշտ վախվորած ենք»:
Արփինե ՍԻՄՈՆՅԱՆ
