«Մայիսի 7-ի առավոտյան այցելել եմ եկեղեցի, մոմ եմ վառել ու խնդրել եմ Աստծուց, որպեսզի ների այն մարդկանց, ովքեր իրենց հոգիները վաճառել են մի քանի դրամով: Ես ինքս անմիջապես ներել եմ նրանց, որպեսզի մեջիցս վերանա այդ չարությունը»,- Aravot.am-ի հետ զրույցում իր հետընտրական տրամադրությունն այսպես ներակայացրեց թիվ 19 ընտրատարածքում Սեյրան Սարոյանին պարտված Հակոբ Հակոբյանը (Ճոյտ): Իսկ «վաճառած հոգիներ» ասելով, պարոն Հակոբյանը նկատի ունի այն ընտրողներին, ովքեր ընտրակաշառք են վերցրել. «Այդ մարդիկ ոչ թե դիտավորյալ են արել, այլ նրանց սոցիալական ծանր վիճակն է ստիպել գնալ այդ քայլին: Ես միանգամից ներել եմ իմ ժողովրդին»:
Պարոն Հակոբյանը մեզ հետ զրույցում իր պարտությունը համեմատեց «Սենյոր Ռոբինզոն» հայտնի կոմեդիա-ֆիլմի հետ: «Հիշո՞ւմ եք, որ կինոյի մեջ սեւամորթ աղջկա վրա սիրահարվում են Ռոբինզոնն ու սեւամորթ տղան: Ամենակարեւոր պահը, որ այդ երկուսը պիտի աղջկա համար պայքարեին ու արտասանեցին. երբ սեւամորթ տղան ասաց` солнышко…жарко- жарко …, բոլորը ծափահարեցին: Բայց, երբ Ռոբինզոնը Շեքսպիրից արտասանեց` быть или не быть, բոլորը բանանի կլեպներով խփեցին, քանի որ չէին հասկանում ինչ էր ասում: Կարեւորը այն չէ, թե դու ինչ ես ասում, կարեւորը այն է` թե մարդիկ ինչ են հասկանում: Հիմա մենք որքան էլ փորձեցինք քաղաքականապես կրթել ժողովրդին, մարդիկ չհասկացան: Ես համարում եմ, որ մարդիկ մեզ բանանի կլեպներով խփեցին: Իսկ էն մեկը, որ жарко- жарко ասաց, իրան ընտրեցին»: Պարոն Հակոբյանը, իր խոսքերով ասած, իրեն էլ է մեղավոր համարում, որ մարդիկ իր իր հակառակորդից գումար են վերցնել. «Ժողովուրդն այնքան աղքատ է ապրում, որ այդ 10 հազար դրամի համար կարող է իր հոգին վաճառել: Նայում եմ նախորդ տարիներին Ազգային ժողովում աշխատած իմ տարիներին, նայում եմ այսօրվա իմ ակտիվ կյանքին ու տեսնում մեղքի իմ բաժինը, քանի որ չեմ կարողացել այնպես անել, որ իմ ժողովրդի սոցիալական վիճակն այնպես լիներ, որ իր ձայն չծախեր»:
Նելլի ԲԱԲԱՅԱՆ
