Գրքի համաշխարհային մայրաքաղաք հռչակված Երեւանում գիրքը, ըստ էության, գոնե մինչ այսօր չի դարձել այն կարեւոր գործոնը, որի շուրջ պիտի ձեւավորվեին որոշակի ավանդույթներ: Այդուհանդերձ, այսօր արդեն գրքի շնորհանդեսների ավանդական ձեւին փոխարինելու են գալիս արեւմուտքում վաղուց գոյություն ունեցող շնորհանդես-վաճառքների մշակույթը, օրինակ, վերջերս ՆՓԱԿ-ում՝ Հովհաննես Թեքգյոզյանի «Կորուսյալ քաղաք», «Բյուրոկրատում»՝ Կարինե Խոդիկյանի «Եկել եմ, որ մնամ» եւ այլն:
Երեկ Գյումրիի մարզային գրադարանում տեղի ունեցավ բանաստեղծ Գեւորգ Թումանյանի (լուսանկարում) «Աստվածային ժամանցներից զատ» ժողովածուի շնորհանդես-վաճառքը: Սրանով «Անտարես» գրահրատարակչական մեդիա- հոլդինգը մեկնարկում է միջոցառումների շարքը, որը միտված է մարզերում աշխուժացնել գրական կյանքը, հրատարակվող գրքերը հասցնել մարզեր, ապահովել գրող-ընթերցող շփումը եւ, վերջապես, աջակցել մարզային գրողներին՝ առաջիկայում հրատարակելով նրանց գրքերը:
Գեւորգ Թումանյանը ունի հրատարակած երկու գիրք՝ «Անընդհատ անառակ որդի» (2002թ.) եւ «Ճախրող սարդ» (2008թ.): Նոր՝ «Աստվածային ժամանցներից զատ» ժողովածուում ընդգրկված բանաստեղծությունները՝ ի տարբերություն նախորդ գրքերի, գրողի սեփական տագնապների, ցնծությունների, ակնթարթային տպավորությունների մասին են:
Կարդացեք նաև
«Առավոտը» բանաստեղծից հետաքրքրվեց նախորդ գրքերի վաճառքի «արդյունքներով»: Մեր զրուցակիցը խուսանավելով հարցից, այդուհանդերձ, ասաց հետեւյալը. «Առաջին գրքիս վաճառքի ճակատագիրը տխուր է: Գրողների միությունը ինձ «նվիրեց» 100 օրինակ, իսկ մնացած 400-ը հավանաբար հատկացրել են գրադարաններին, մշակութային այլ օջախների: Երեւի Հայաստան ժամանած արվեստագետներն էլ նվերի տեսքով ստացել են գիրքս…»:
Գրականագետ Արքմենիկ Նիկողոսյանը գրքի շնորհանդես-վաճառքը որակելով մեզանում նոր մշակույթ՝ ասաց. «Այդ նորը վերջապես ուզում ենք ներմուծել հայաստանյան գրական շուկա, որ շնորհանդեսին հրավիրվածները ոչ միայն իրենց բաժակաճառերով գովերգեն գրողներին, այլեւ գիրք գնեն»:
«Առավոտին» հայտնի դարձավ, որ 500 օրինակ տպագրված «Աստվածային ժամանցներից զատ» ժողովածուն շնորհանդես-վաճառքի արդյունքում շուրջ 30 գնորդ ունեցավ:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
