Թուրք ֆոտոլրագրող Ումուդ Վեդաթը Aravot.am-ի հետ զրույցում խոսելով ադրբեջանցիների կողմից պարբերաբար խախտված հրադադարի ռեժիմի, մասնավորապես՝ վերջին երկու օրվա ընթացքում սահմանին տեղի ունեցած դեպքերի առիթով տված զոհերի մասին՝ ասաց. «Բացի խնդրի քաղաքական հատվածը, նախ ասեմ, որ յուրաքանչյուր մարդու մահվան մասին լուրը ամենավատ բաներից մեկն է, որ լսում ես: Ու բացի այն հարցից, որ հակամարտությանը հարկ է ընդհանուր լուծում տրվի, պետք է նշեմ, որ նախ հարկավոր է առանձնացնել թեմաները: Այսինքն՝ Հայաստան-Ադրբեջան հատվածը անհրաժեշտ է տարանջատել Հայաստան-Թուրքիա հարաբերություններից»:
Մեր դիտարկմանն ի պատասխան՝ չե՞ք կարծում, որ հայ- ադրբեջանական խնդիրը խանգարում է Հայաստան-Թուրքիա հարաբերությունների բարելավմանը, անկախ նրանից՝ ինչպես են ,օրինակ, միմյանց երկրներում ընդունում հարեւան երկրի լրագրողներին, Ումուդ Վեդաթը նշեց. «Երեւի ինչ-որ առումով կապվածություն կա Հայաստան- Թուրքիա, Հայաստան- Ադրբեջան հարթություններում, բայց դա մեծամասամբ քաղաքական մակարդակներում է: Իրականում՝ ժողովուրդների մակարդակով, Ադրբեջանի հետ կապվածություն չկա. դա իմ տեսանկյունից է: Օրինակ՝ ես չունեմ ոչ մի ադրբեջանցի ընկեր, եւ իմ շրջապատում չկա մեկը, որն ադրբեջանցի է ճանաչում: Մենք նույնիսկ միասնական անցյալի եւ պատմության մասին հիշողություն չունենք: Մասնավորապես, վերջին տարիների ընթացքում ես ավելի շատ հայկական մշակումների մեջ եմ, ավելի շատ հայ ընկերներ ունեմ ու չեմ ճանաչում որեւէ ադրբեջանցու՝ որպես այդպիսին: Ադրբեջանցին ինձ համար գործոն չէ, հայ ընկերների լայն շրջանակ ունեմ, հայերն ավելի կարեւոր դեր են խաղում ինձ համար»,- հավելեց նա:
Եվա ՀԱԿՈԲՅԱՆ
Կարդացեք նաև
