Հատված ՀՅԴ Հայաստանի Գերագույն մարմնի փոխներկայացուցիչ ԱՐՍԵՆ ՀԱՄԲԱՐՁՈՒՄՅԱՆԻ հարցազրույցից
-Գերագույն ժողովը որեւէ կերպ անդրադարձե՞լ է «Բարգավաճ Հայաստանի» հետ հարաբերությունների թեմային։
-Նախընտրական շրջանում ԲՀԿ-ի հետ համագործակցություն եղել է միասնական շտաբի շրջանակում։ Այդ փուլն ավարտված է, եւ դա կարող է օգտակար լինել նաեւ հետագա ինչ-ինչ ձեւաչափով համագործակցության համար։ Բայց «Բարգավաճ Հայաստանի» հետ առանձին համագործակցության ձեւաչափեր ճշտելու խնդիր, որպես այդպիսին, դրված չէ։
-Չե՞ք կարծում, որ ԲՀԿ-ն այնուամենայնիվ առանձնանում է «այլընտրանքային» մյուս ուժերից, այն առումով, որ ծանրակշիռ ներկայություն ունենալով խորհրդարանում, կարող է էական դերակատարություն ունենալ առաջիկա քաղաքական զարգացումներում։
-Նախագահական ընտրություններն իրենց տրամաբանությամբ եւ բնույթով ընդհանրապես տարբերվում են խորհրդարանական ընտրություններից։ Այդ տեսակետից խորհրդարանում ավելի կամ պակաս ներկայացված լինելու հանգամանքը, չեմ կարծում, թե շատ մեծ նշանակություն է ունենալու նախագահական ընտրություններում։
Մենք ունենք նախադեպ, երբ խորհրդարանում փոքր խմբակցություն ունեցող քաղաքական ուժը նախագահական ընտրություններում մի քանի անգամ ավելի բարձր ցուցանիշներ է արձանագրել, եւ ճիշտ հակառակը։ Այս առումով, նախագահական ընտրությունները դիտում ենք որպես առանձին գործընթաց մեր մատնանշած կարեւորագույն խնդրի՝ ամբողջական իշխանափոխության համատեքստում։
Այդ խնդրի շուրջ ընդհանուր քաղաքական համաձայնության գալու դեպքում միայն կարելի է քննարկել համագործակցության կոնկրետ ձեւաչափերի հարցը։ Հակառակը՝ ի սկզբանե անձի շուրջ համախմբվելու, այս կամ այն թեկնածուին պաշտպանելու խնդիր դնելը կնշանակեր փառավոր կերպով այդ գործընթացը ձախողել։
Լիլիթ ՊՈՂՈՍՅԱՆ
«Հայոց աշխարհ»
