Երեւանի ճարտարապետության եւ շինարարության պետական համալսարանի ռեկտոր Հովհաննես Թոքմաջյանն այսօր «Հայելի» ակումբում նշեց, որ իրենց բուհի մասնագետները նախատեսել են օդանավակայանների կառուցման եւ վերականգնման աշխատանքներ սկսել ոչ միայն Արցախում, այլեւ Հայաստանի մյուս քաղաքներում: «Եթե հիշում եք ԽՍՀՄ տարիներին Հայաստանում գրեթե բոլոր փոքր քաղաքներն ունեին օդանավակայաններ: Հետագայում մի շարք օդանավակայաններ վերածվեցին բոստանների: Ցավոք սրտի, դա այդ տարիների բացթողումներից էր: Հիմա եղածը պետք է պահել, վերականգնել, որովհետեւ ավիացիան, մանավանդ շրջափակման վիճակում գտնվող երկրի համար կարեւորագույն տրանսպորտային միջոց է, այն նաեւ բարոյահոգեբանական խնդիրներ է լուծում»,-նշեց ռեկտորը:
Հիշեցնենք, որ նրա ղեկավարած բուհի մասնագետները նախագծել են Ստեփանակերտի օդանավակայանը, որը բացի քաղաքականից, այլ նշանակություններ էլ ունի ինքնիշխան Արցախի համար:
Գոհար ՀԱԿՈԲՅԱՆ
