Լոռու մարզի Օձուն գյուղից ոչ շատ հեռու գտնվում է հայտնի «Օձի պորտը»:
Ասում են` «Օձի պորտ»-ից հոսող ջուրը բուժիչ է: Ուխտավորները կտրում-անցնում են Օձուն բարձացող շրջադարձերով հարուստ ճանապարհը` խմելու և իրենց հետ վերցնելու այդ ջուրը:
Այս վայրի հետ կապված լեգենդներ են հյուսվել:
Ըստ լեգենդի` մի կին հանդիպում է վիշապ օձերի և օգնություն է կանչում: Հովհաննես Օձնեցին ուղարկում է իր աշակերտներին: Յոթ աշակերտ գնում ու չեն վերադառնում: Օձնեցին ինքն է գնում: Նա աստվածաշնորհ մարդ է լինում, գավազանով հարվածում է օձին ու ասում. «Թող քո պորտից բուժիչ ջուր դուրս գա, իսկ ինքդ քար դարձիր»:
«Օձի պորտ» այցելող ուխտավորները հստակ մատնանշում են օձի պատկերը` ցույց տալով ժայռի մեջտեղի հատվածում երկայնքով «սլացող» մուգ գույնի քարը:
Այդ քարի ուղիղ մեջտեղից` «Օձի պորտից», ջուր է հոսում:
Նկարներում Գյումրիի քաղաքացիներն են, ուխտավորներ, որոնք եկել և ջուր են խմում «Օձի պորտից»` հավատով, որ բոլոր հիվանդությունները կբժշկվեն:
Արփինե Արզումանյան` (mynews.am)
