Արտակ Նազարյանի մահվան գործով դատավարության օգոստոսի 15-ի նիստում տուժողի իրավահաջորդ Ծովինար Նազարյանը եւ վերջինիս ներկայացուցիչները` փաստաբան Մուշեղ Շուշանյանը, իրավապաշտպան Ռուբեն Մարտիրոսյանը, միջնորդեցին որպես վկա դատարան հրավիրել եւ հարցաքննել նախաքննությունն իրականացրած քննիչներ Սարգիս Մադաթյանին, Հայկ Մարգարյանին, Լեւոն Պետրոսյանին: Միջնորդությունը հրապարակելիս Մուշեղ Շուշանյանը հայտարարեց, որ գործով կատարվել է միակողմանի եւ հանցավոր քննություն, ինչի հետեւանքով Արտակ Նազարյանի սպանությունը ներկայացրել են որպես ինքնասպանություն:
Շուշանյանը մանրամասն հայտնեց նախաքննության ընթացքում քննիչների կատարած խախտումները: Նա , նշելով, որ ՀՀ քրեական դատավարության օրենսգրքով մի շարք անձինք` այդ թվում քննիչները, չեն կարող որպես վկա դատարան հրավիրել եւ հարցաքննվել, հայտարարեց, որ նշած նորմը հակասում է մարդու իրավունքների եւ հիմնարար ազատություննների մասին եվրոպական կոնվենցիայի 6-րդ հոդվածին, որտեղ օգտագործված «վկա» հասկացողությունը, համաձայն եվրոպական դատարանի նախադեպային իրավունքի, ունի ինքնավար նշանակություն: Ըստ այդմ` որպես վկա կարող է կանչվել եւ հարցաքննվել ցանկացած անձ, ով կարող է դատարանին ենթադրաբար հայտնել գործի համար նշանակություն ունեցող փաստեր եւ հանգամանքներ: Այս միջնորդությանը կողմ էին ամբաստանյալ կապիտան Հակոբ Մանուկյանը, նրա պաշտպան Հրանտ Գեւորգյանը, ամբաստանյալ զինվորներ Հարութիկ Կիրակոսյանը, Մխիթար Մխիթարյանը, Ադիբեկ Հովհաննիսյանը, ամբաստանյալ լեյտենանտ Վահագն Հայրապետյանը եւ նրա պաշտպան Լեւոն Պողոսյանը: Միջնորդության դեմ արտահայտվեց միայն գործով մեղադրող Հայկ Հարոյանը: Միջնորդությունը բավարարել-չբավարարելու հարցը կորոշվի դատական հաջորդ նիստում: Դատավոր Սամվել Մարդանյանն այն նշանակեց օգոստոսի 21-ին:
Ոսկան ՍԱՐԳՍՅԱՆ
Կարդացեք նաև
