ՀՀ մարզերի համաչափ զարգացման համար անհրաժեշտ է քաղաքական կամք ու դա իրագործելու ձգտում:
Այդ մասին Aravot.am-ի հետ հարցազրույցում նշում է «Վոլդ Վիժն Հայաստան» կազմակերպության Լոռու եւ Տավուշի մարզերի զարգացման ղեկավար Արմեն Բեժանյանը:
Ըստ նրա`եթե Երեւանը մեծ զարգացում է ապրում տնտեսության, ծառայությունների, սպասարկման եւ այլ առումներով, նույն պատկերը չկա մարզերում:
«Որպեսզի իշխանությունը, կառավարությունը կարողանա զարգացումը համաչափ տանել, երկու բան է անհրաժեշտ, մեկը` քաղաքական կամք, իրենք ի սրտե ուզենան եւ հավատան, եւ դա իրագործելու կամք: Բանավոր խոսքում այդ քաղաքական կամքը դրսեւորվում է, բայց իրականության մեջ ես դա չեմ տեսնում»:
Կարդացեք նաև
Արմեն Բեժանյանը կարծում է, որ մարզերում տնտեսության, արտադրության զարգացման որոշակի ճյուղերի առումով օֆշորային գոտիների ստեղծման հնարավորություն կա, իրագործման դեպքում այն կխթանի մարզերի համաչափ զարգացմանը:
«Ենթադրենք, լինի այնպիսի քաղաքականություն, որ, օրինակ, այն արտադրատեսակները, այն ճյուղերը, որոնք կամ Հայաստանում զարգացած չեն, կամ կենտրոնացած են Երեւանում, հնարավորություն տրվի զարգացնելու մարզերում, այս կամ այն հարկերից ազատումը եւս կխթանի մարզերի համաչափ զարգացումը»:
Նա նշում է, որ այդ դեպքում, թեեւ հարկերից ազատումը որոշակիորեն կնվազեցնի պետական բյուջեի մուտքերը, այնուամենայնիվ, արդյունքում մարզերում աշխատատեղերի ստեղծմամբ կզարգանա նաեւ մարդկանց պոտենցիալը:
«Եթե մարզում աշխատատեղեր ստեղծվեն, պոտենցիալը զարգանա, դա եւ մարդկանց բեռը կթեթեւացնի, եւ կնպաստի համապատասխան մրցունակ աշխատույժի ստեղծմանը, մարդիկ կտեսնեն, որ մարզերում էլ արտադրության ու գիտելիքների զարգացման հնարավորություններ կան ու չեն արտագաղթի»,-եզրափակում է Արմեն Բեժանյանը:
Անուշ Բուլղադարյան
Վանաձոր
