«Գյումրիում ընտրությունները բնականոն ու նորմալ հունով են ընթանում »,- Aravot.am-ին վստահեցրեց 34 ընտրատարածքային ընտրական հանձնաժողովի նախագահ Էդվարդ Բաղրամյանը:
Կուտակումների վերաբերյալ ահազանգերի մասին պարոն Բաղրամյանն ասաց, որ նման զանգվածային խնդիր չկա , միայն, հնարավոր է, որ օրվա որոշ ժամերին փոքր կուտակումներ լինեն` պայմանավորված նրանով, որ ընտրողները միանգամից են գալիս:
Ինչ վերաբերում է Asparez.am-ի տարածած տեղեկություններին, թե «34-19 ընտրատեղամասում (թիվ 8 մանկապարտեզ) ժամը 12.30-ին առաջացել են կուտակումներ, մոտ 18 մարդ միանգամից մուտք է գործել տեղամաս: Վստահված անձանց բողոքից հետո հանձնաժողովի նախագահը ոստիկանի օգնությամբ դուրս է հրավիրել 2-3 հոգու, որպեսզի պահպանվի տեղամասում թույլատրելի ընտրողների թիվը: Վստահված անձինք նաեւ դժգոհում են ոստիկանների վատ աշխատանքից», պարոն Բաղրամյանն ասաց . «Նման ահազանգ չի ստացվել, եթե նման խնդիրներ լինեին, տեղամասերի նախագահներն ինձ տեղյակ կպահեին: Ամեն ինչ կարող են ասել, ունենք 79 տեղամաս, եւ այս պահին այդ ինֆորմացիային հնարավոր չէ տիրապետել: Ընտրություններն անցնում են նորմալ, բնականոն հունով, «Ասպարեզը» փոխանակ իր ընտրություններով զբաղվի, ավելի շատ զբաղվում է չգիտեմ ինչով»:
Ընտրակաշառք բաժանելու մասին խոսակցությունների մասով էլ կրկին ասաց, որ նման ինֆորմացիա չեն ստացել: Նա հերքեց նաեւ Գյումրու ընտրատեղամասերում առաջին 5 ժամերին միանգամից 200-400-ական հոգու քվեարկության մասին լուրը:
Կարդացեք նաև
Արփինե ՍԻՄՈՆՅԱՆ