Այսօր Կովկասի ինստիտուտում կայացած «Նոր քաղաքացիական շարժումներ Հայաստանում» թեմայով քննարկման ժամանակ բլոգեր Տիգրան Քոչարյանը հետեւյալն ասաց. «Իմ կարծիքով քաղաքացիական հասարակություն ասվածը միֆ է: Ինձ ընդհանրապես պարզ չէ, թե ինչ է նշանակում քաղաքացիական հասարակությունը: Դա քաղաքացիների հասարակություն է, թե ինչ: Մարդիկ շատ են սիրում խոսել ժողովրդի ազգի անունից: Ես էլ ժողովրդի մի մասնիկն եմ, բայց… Մարտի 1-ին էլ ժողովրդին ջարդեցին սպանեցին, խոսեցին… ժողովուրդը: Այստեղ խնդիր կա, պետք է շատ զգույշ աշխատել»:
Քոչարյանը նշեց նաեւ, որ հաճախ շոշափվում է քաղաքացիական շարժումների գրանտակեր լինելու հարցը: Ըստ նրա՝ Հայաստանում, այո, գրանտներ մտնում են մսխելու համար, հիմնականում ոչ մի աշխատանք չի արվում, բայց՝ «չեմ ուզում ոչ մեկի հացին վայիս լինել»:
Ներկայիս քաղաքացիական շարժումներում, ըստ Քոչարյանի, հիմնականում նույն մարդիկ են. «Նույն դեմքերին տեսնում ես ամենուր, նրանք բանակի խնդիրներից մինչեւ հանքեր են հասնում. նույն դեմքերը հոգնեցնում են: Անընդհատ նույն անուններն ես լսում: Ոլորտը կարծես թե բաժանված է մի քանի հոգու միջեւ: Enjoy-ական մինի օլիգարխիկ վիճակ է: Գյումրիում Լեւոն Բարսեղյան անունն է, Վանաձորում՝ Արթուր Սաքունց եւ այլն»,- նշեց բլոգերը հավելելով, որ շատ դեպքերում ակտիվությունը ցուցաբերվում է այնտեղ որտեղ PR-ը լավ է արվում, այսինքն՝ լրատվամիջոցները շատ են անդրադառնում:
ԵՎԱ ՀԱԿՈԲՅԱՆ
