Արտակ Նազարյանի մահվան գործով դատավարության հոկտեմբերի 10-ի նիստում դատավոր Սամվել Մարդանյանը անդրադարձավ նախորդ նիստերից մեկում տուժողի իրավահաջորդ Ծովինար Նազարյանի եւ նրա ներկայացուցիչ, իրավապաշտպան Ռուբեն Մարտիրոսյանի կողմից ներկայացված միջնորդությանը, որով պահանջվում է Արտակ Նազարյանի հագուստը, գլխարկը եւ գուլպաները ենթարկել դատակենսաբանական եւ դատաքիմիական փորձաքննության: Ռ. Մարտիրոսյանը հայտարարեց, որ նախաքննական մարմնի կողմից էական բացթողում է, որ Ա.Նազարյանի հագուստը փորձաքննության չի ուղարկվել, դա արվել է միտումնավոր: Իրավապաշտպանի խոսքերով` մեկ տարի շարունակվող դատավարության ընթացքում այդպես էլ պատասխան չեն տրվել այն հարցերին, թե Ա. Նազարյանի հագուստի վրա կա՞ն արնանման հետքեր, եթե այո, դա արյո՞ւն է, ո՞ւմ արյունն է, Արտակ Նազարյա՞նի, այլ անձանց արյան հետքեր կա՞ն, Նազարյանի հագուստի վրա այլ հետքեր կա՞ն եւ այլն: Իրավապաշտպանն ասաց, որ դատարանում որպես վկա ցուցմունք տված քննիչ Լեւոն Պետրոսյանն այդպես էլ չկարողացավ տալ նշված հարցերի պատասխանները: Ռ. Մարտիրոսյանը եւ Ծովինար Նազարյանն ասացին, որ սկզբում տուժող կողմին ներկայացվել է Ա. Նազարյանի գլխարկը` առանց արյան հետքերի: Իսկ դատարանում որպես ապացույց հետազոտված Նազարյանի գլխարկը թաթախված է եղել արնանման նյութի մեջ: Ռ. Մարտիրոսյանն ասաց,որ Նազարյանին մահից 6 ժամ առաջ ծեծել, խոշտանգել են, որ նա դիմադրել է, խոշտանգողներից Նազարյանի հագուստի վրա հավանաբար հետքեր են մնացել , որ Նազարյանի ստամոքսում պետք է արյուն հայտնաբերվեր, սակայն դատաբժշկական եզրակացությամբ այն դատարկ է եղել, սպանությունից հետո Նազարյանի դիակը տեղափոխվել է: Իրավապաշտպանն անարժանահավատ համարեց դատաբժշկի այն եզրակացությունը,թե Նազարյանի դիակի` մաշկից զուրկ հատվածների պատճառը կարող էր լինել այն, որ Նազարյանի մարմինը 4-5 ժամ գտնվել է արեւի տակ:
Իրավապաշտպանը, ում խոսքերով` ինքը 16 տարվա ընթացքում ներկա է եղել շուրջ 450 դիակների հետազոտմանը, նշեց, որ Նազարյանի մարմնի որոշ հատվածներում մաշկի բացակայության պատճառը հավանաբար խոշտանգողների կողմից նրա վրա թափած տաք հեղուկն է եղել, որ ի հետքերը կարող են լինել Նազարյանի հագուստի վրա: Տուժողի իրավահաջորդի եւ նրա ներկայացուցչի միջնորդությանը միացան Հակոբ Մանուկյանի պաշտպան Հրանտ Գեւորգյանը եւ Վահագն Հայրապետյանի պաշտպան Լեւոն Պողոսյանը, միջնորդությանը դեմ արտահայտվեցին մեղադրողներ Հարություն Հարությունյանը եւ Հայկ Հարոյանը: Դատավոր Մարդանյանը ներկայացված միջնորդության վերաբերյալ որոշում կայացնելու համար հեռացավ խորհրդակցական սենյակ: Դատավորը հայտարարեց, որ մերժում է ներկայացված միջնորդությունը, նաեւ նշեց, որ դատարանը խորհրդակցական սենյակում դատական վերջնական ակտ կայացնելիս հաշվի կառնի միջնորդության մեջ ներկայացված փաստերը: Ռ. Մարտիրոսյանը դատավորին ինքնաբացարկ հայտնեց: Դատավորը չքննարկեց այդ բացարկը, ասելով, որ Ռ. Մարտիրոսյանի կողմից նախկինում իրեն նման բազմաթիվ ինքնաբացարկներ են հայտնվել: Տուժողի իրավահաջորդի ներկայացուցիչն ասաց, որ դա նոր ինքնաբացարկ է, սակայն դատավորը դա չընդունեց: Իրավապաշտպան Մարտիրոսյանը հայտարարեց, որ դատը աբսուրդի թատրոն է, դատավորին մեղադրեց միտումնավորության մեջ, ասելով.«Եթե ես հնարավորություն ունենայի 3 րոպեն մեկ ձեզ բացարկ հայտնելու, ես 2 րոպեն մեկ ձեզ բացարկ կհայտնի, որովհետեւ այս փորձաքննության մերժումով դուք ակնհայտորեն ցույց տվեցիք, որ անաչառ չեք, որ չեք ուզում սպանության գործում կատարվի բազմնակողմանի եւ օբյեկտիվ դատաքննություն»:
Այնուհետեւ դատարանն անդրադարձավ Հակոբ Մանուկյանի պաշտպաններ Հրանտ Գեւորգյանի եւ Արմինե Ղասաբողլյանի ներկայացրած միջնորդությունը, որով առաջարկվում է Ա. Նազարյանի հետմահու կրկնակի դատահոգեբանական փորձաքննություն կատարել; Պաշտպաններն ասացին, որ փորձագետ, հոգեբան Էլդա Գրինի նախկինում կատարած դատահոգեբանական եւ դատահոգեբուժական փորձաքննությունը օբյեկտիվ չէ, որ աշխարհում գոյություն չունի մահվանից մեկ-մեկուկես ժամ առաջ միջին աստիճանի խմածության վիճակում գտնված անձի (ըստ դատաբժշկի եզրակացության Ա. Նազարյանը եղել է նման վիճակում) հետմահու դատահոգեբանական փորձաքննություն կատարելու մեթոդաբանություն, որ հոգեբանն իր եզրակացությունը կայացնելիս առաջնորդվել է նախաքննության փուլում ապօրինի կալանքի տակ գտնված վկաների կեղծ ցուցմունքներով: Դատական նիստն ընթանում էր լարված, վիճաբանություններ եղան Ռուբեն Մարտիրոսյանի եւ դատավոր Մարդանյանի, դատավորի եւ Հրանտ Գեւորգյանի միջեւ: Դատական հաջորդ նիստը կկայանա հոկտեմբերի 16-ին:
Կարդացեք նաև
Ոսկան ՍԱՐԳՍՅԱՆ
