Գիտակցելը, որ դու հասարակ մահկանացու ես, իմաստության հզոր աղբյուր է: Գիտակցելը, որ մի օր ամեն ինչ վերջանալու է, հնարավորություն է այրել քո մեջ կիրքը, ռիսկի դիմելու պատրաստակամություն ձեռք բերել, գլխիվայր նետվել խաղի մեջ, որը մենք անվանում ենք կյանք: Իսկ ինչպես դու կվարվես, եթե լինի քո կյանքի վերջին օրը: Արդյոք պատրաստ կլինես անելու ամենը ու անհնարինը: Թերևս պատկերացնել չենք կարող, որ օրը կմթնի, ու նորը չի գա: Փոքրիկ հարցում, անհնար ու իրական պատասխաններ , մի փոքր զավեշտալի, բայց արդյունքում չենք հավատում, որ օրը դու ապրում ես վերջինն է լինելու:
Աննայի թերևս միակ ցանկությունը սեքսով զբաղվելն է: Իր կյանքի վերջին օրը գողություն կանի, կգնա ծառայող ընկերոջ մոտ, կտրվի նրան մինչև վերջ, ու ինչպես ինքն է նշում. «Թքած, թե վաղը չի գալու»: Իսկ 20-ամյա Հարությունը ոչ ավել ոչ պակաս «քելեխ» կպատրաստի, թե ինչպես գաղտնիք մնաց, վերջում էլ զայրացավ. «Տեսնես, դուք գո՞հ եք ձեր տված հարցից»:
Կան ցանկություններ, խոսքեր, արտահայություններ, որոնք երբևէ չես ասել, վերջին օրը կարտաբերեիր «Նրանց, ում սիրում եմ, կասեի՝ սիրում եմ, ումից զզվում եմ, մեծ հաճույքով կասեի: ՈՒ կանեի այն, ինչ ամաչում էի մինչև այսօր, կամ ինձ համար ամոթ էր»,-անկեղծանում է Մերին:
Աստվածավախ մարդիկ էլ շատ են իմ շրջապատում , վախեցած իմ հարցից, միանգամից հիշեցին Աստծուն, գործած մեղքերը, դաժան դատաստանը ու պատասխանեցին, որ կաղոթեինք մինչև մեռնելը, աղոթելու ընթացքում էլ աղիողորմ կարտասվեին:
Հարցվածների գրեթե 30 տոկոսը կհամբուրեր մայրիկին որքան հնարավոր է շատ ու կասեր՝ ես սիրում եմ քեզ: Մոտ 20 տոկոսը սիրած մարդու հետ կանցկացներ իր կյանքի վերջին օրը: Իսկ Արամը, ով համալսարանում ունի 2 լիկվիդ, միանգամից պայծառացավ հարցից. «Ո՞ւր է տենց բախտ: Լիկվիդներս չէի հանձնի»: Մյուսն էլ երկար մտածեց. «Հա, կգնայի խմելու ու պարելու, այնքան կխմեի, որ մահս խաղ ու պար լիներ»:
Մելանյա Հարությունյան
