Երբ ԲՀԿ-ն իշխանական կոալիցիայի մեջ էր, ինչո՞ւ չէիք բարձրաձայնում, որ Սամվել Ալեքսանյանը, Ռուբեն Հայրապետյանը, Սուրեն Խաչատրյանը գաղափարախոսության մարդիկ չեն եւ նրանց շուրջ մարդիկ հավաքվում են բոլորովին էլ ոչ նրա համար, որ ՀՀԿ-ի գաղափարախոսության կրողն են: Aravot.am-ն այս հարցն ուղղեց ԲՀԿ պատգամավոր Վահան Բաբայանին: Հիշեցնենք, որ նա այսօր քաղաքական բանավեճի ժամանակ ՀՀԿ-ական պատգամավոր Արայիկ Հովհաննիսյանին հեգնել էր, որ «Ես համոզված եմ, որ նույն ՀՀԿ-ի շարքերում ազգային մատենաշար կարդալով չէ, որ Սյունիքի մարզում Սուրեն Խաչատրյանի, Սամվել Ալեքսանյանի կամ Ռուբեն Հայրապետյանի շուրջ մարդիկ հավաքվել են՝ նման տեսակետներից»:
Վահան Բաբայանը պատասխանեց. «Ես ուղղակի մի քանի մարդու անուն տվեցի, որ մեր երկրում ավելի շատ մեծ գործառույթ իրականացնում են անհատները, քան գաղափարախոսական ամսագրերը: Եվ այդ օրինակը ես բերեցի նման հարցի շուրջ: Այսինքն, ոչ թե ինչ-որ մարդկանց անուններ ենք տալիս, կամ ինչ-որ փորձում ենք այդ մարդկանց մասին բաներ խոսել, ես զուտ օրինակ եմ բերել: Հայաստանի քաղաքական դաշտում դեր խաղում են անհատները եւ ես չեմ հավատա, որ ինձ ասեն՝ մարդիկ դեր չեն խաղում, դեր խաղում է կուսակցության գաղափարները, կամ առավել եւս՝ որոշակի տպագրված նյութեր»:
Մեր հարցին՝ իսկ ձեր կուսակցությունից չե՞ք հիշում ինչ-որ մարդիկ, որոնց շուրջ էլ մարդիկ հավաքվում են՝ բոլորովին էլ ոչ կուսակցական գաղափարներից ելնելով՝ նա պատասխանեց՝ «Դա Հայաստանի Հանրապետությունում եւ Հայաստանի քաղաքական իրավիճակում գոյություն ունեցող իրավիճակ է: Համախմբում է մարդկանց ավելի շատ անհատը, անհատի անցած ուղին, գործը, անհատի ճանապարհը, բնավորությունը, մոտեցումները, քան գաղափարական ծրագրային նյութերը: Այսքան բան»:
Հռիփսիմե ՋԵԲԵՋՅԱՆ
Կարդացեք նաև
