Արարատի և Վայոց Ձորի մարզերի ընդհանուր իրավասության դատարանում՝ դատավոր Խաչիկ Հովհաննիսյանի նախագահությամբ, շարունակվում է սոցցանցի միջոցով շորթման գործով դատաքննությունը:
Ըստ մեղադրանքի, Իվան Ավագյանը 2012թ մարտ ամսին գործով չպարզված օրը, գումար շորթելու նպատակով «www.odnoklassniki.ru» սոցիալական ցանցում «բուբու կուկու 123 21 գոդ, Էջմիածին Արմենիա, Ռոսիա» պայմանական անվամբ գրանցված անվանական էջից մուտք է գործել Տավուշի մարզի Արծվաբերդ գյուղի բնակչուհի Ասյա Ասիլբեկյանի` նույն սոցիալական ցանցում գտնվող անձնական էջ, վերջինիս թվով 5 լուսանկարները վերբեռնել և տեղադրել է իր անձնական էջում, որից հետո վերջինիս հաղորդագրություն է ուղարկել և նրա մասին արատավորող տեղեկություններ տարածելու, մասնավորապես, նկարները մոնտաժելու, պոռնկագրական բնույթի դարձնելու և համացանցի սպառնալիքով Ա. Ասիլբեկյանից պահանջել է 1 հատ 1000 դրամ արժողության բջջային հեռախոսի հաշվեկշռի լիցքավորման քարտ: Բացի այդ, 2012թ. մայիսի սկզբին, չպարզված օրը, դարձյալ գումար շորթելու դիտավորությամբ, նույն սոցիալական ցանցի իր անձնական էջից մուտք է գործել Երևան քաղաքի բնակչուհի Գեղեցիկ Մինասյանի անձնական էջ, այնտեղից վերբեռնել վերջինիս դստեր՝ Սեդա Մինասյանի թվով 6 լուսանկարները, տեղադրել իր անձնական էջում և հաղորդագրություն էր ուղարկել Գ. Մինասյանին և նրա մասին արատավորող տեղեկություններ տարածելու, մասնավորապես` նկարները մոնտաժելու պոռնկագրական բնույթի դարձնելու և համացանցում տարածելու սպառնալիքով նրանից պահանջել է և ստացել է բջջային հեռախոսի հաշվեկշռի՝ 20 հատ 1000 դրամ արժողության լիցքավորման քարտ:
