«Առավոտի» շաբաթ օրվա համարում անդրադարձել էինք «Հարավկովկասյան երկաթուղու» կողմից սակագնային փոփոխությանը եւ դրա պատճառով Երեւան-Երասխավան երկաթգծի ուղեւորների դժգոհությանը: Խնդրի շուրջ մեկնաբանություն ստացանք նաեւ ՀՀ տրանսպորտի եւ կապի նախարարությունից: Մեզ հետ զրույցում նախարարության Երկաթուղու վարչության ավագ փորձագետ Վարդան Կարապետյանը նշեց, որ «Հարավկովկասյան երկաթուղի» ՓԲԸ-ն ազատ է ներպետական ուղեւորափոխադրումների սակագները սահմանելու հարցում՝ համաձայն եռակողմ կնքված կոնցեսիոն պայմանագրի, որը կնքվել է ՀՀ կառավարության, «Հարավկովկասյան երկաթուղի» ՓԲԸ-ի եւ «Ռուսական երկաթուղիներ» բաց բաժնետիրական ընկերության կողմից:
Նախորդ հրապարակման մեջ նշել էինք, որ ուղեւորներից շատերի համար ամենահարմար տրանսպորտը երկաթուղին է եւ շատերը համոզված են՝ դա գիտակցելով է ռուսական ընկերությունը թանկացնում սակագները: Ուղեւորների մտահոգությանն ի պատասխան՝ պարոն Կարապետյանն ասաց. «Ընկերության կողմից գինը շատացնելը միգուցե ուղեւորահոսքը կրճատի: Եթե նման գին է սահմանել, ու նման խնդիր կա, իսկ մեզ հետ այդ հարցը դեռ չի քննարկել, կարճ ժամանակում նա իր որոշումը կփոխի, որովհետեւ ոչ ոք այդ տրանսպորտով չի գնալու: Եթե ուղեւորների բողոքները մեզ հասնեն, մենք անպայման կքննարկենք հարցը «Հարավկովկասյան երկաթուղի» ընկերության ղեկավարության հետ»:
ՀՌԻՓՍԻՄԵ ՀՈՎՀԱՆՆԻՍՅԱՆ
Կարդացեք նաև
«Առավոտ» օրաթերթ
