Այս հարցը Aravot.am-ը ուղղեց ՀՀԿ Շիրակի մարզային կառույցի ղեկավար Սահակ Մինասյանին` նրանից մասնավորապես հետաքրքրվելով, թե իր կարծիքով Գյումրիից ընտրված պատգամավորներից ո՞ր մեկն է ամենից շատ աչքի ընկել քաղաքի հիմնախնդիրները Ազգային ժողովում բարձրաձայնելով ու դրանց լուծման ուղղությամբ կոնկրետ քայլեր ձեռնարկելով:
«Ես հարցին մի քիչ ավելի կփորձեմ ոչ ուղիղ պատասխանել. ձեր թույլտվությամբ. պատգամավորի ակտիվ լինելը կախված է շատ ընտրողների ակտիվությունից, ընտրողների ներկայացրած պահանջների տեղին, մշակված լինելուց, և չի կարելի պատգամավորին ասել, թե արի մեր բակը ասֆալտապատի կամ մեր աղբի թափելու խնդիրը լուծի, էդ էլեմենտար խնդիրները պատգամավորները չեն լուծում, դրա համար կա համայնք, համայքնի ղեկավար` գյուղում, քաղաքում, առաջադրեք, լուծեք:Ես ուզում եմ, որ էլ ավելի կենսական, օրենսդրական նշանակություն ունեցող հարցեր բարձրացնեն մեր պատգամավորները, հատկապես մեր ՀՀԿ-ական պատգամավորները, և հետևողական տանեն մինչև լուծում», -այսպիսի խուսափողական պատասխան տվեց ՀՀԿ ղեկավարը:
Մենք ստիպված եղանք դարձյալ հարցնել, թե դուք հիմա գո՞հ եք, թե՞ դժգոհ մեր մարզից ընտրված պատգամավորներից, որին ի պատասխան, պաշտոնյան ասաց. «Ընտրված պատգամավորներին սատարել եմ կարելիին չափ, և բնականաբար անձերը գոհացրել են իրենց չափանիշներով»:
Նշենք, որ հոգսաշատ, խնդիրների մեջ թաղված ու պաշտոնապես ամենաաղքատ ճանաչված Շիրակի մարզից ընտրված պատգամավորները այնքան էլ փոքրաթիվ չեն շիրակցիներին առչնվող խնդիրները գոնե բարձրաձայնելու համար . ԱԺ-ում ունենք մեկ ՕԵԿ-ական` Հովհաննես Մարգարյանը, երկու ԲՀԿ-ականներ` Գյումրիից ընտրված Մարտուն Գրիգորյանն ու արթիկցի Մուշեղ Պետոյանը, և 4 ՀՀԿ-ականներ` հավերժ պատգամավորներ Սուքիաս Ավետիսյանն ու Աշոտ Աղաբաբյանը, նորընտիր երիտասարդներ Նաիրա Կարապետյանն և «Շիրակ» ֆուտբոլային ակումբի սեփականատեր Արման Սահակյանը, ով, ի դեպ, ԱԺ-ում փոխարինելու է Գյումրու քաղաքապետ դարձած Սամվել Բալասանյանին:
Կարդացեք նաև
Նունե ԱՐԵՎՇԱՏՅԱՆ
