«Քրիստոս ծնաւ և յայտնեցավ, մեզ և ձեզ մեծ աւետիս». այսօր Սուրբ Ծննդյան տոնն է: Տեր Շմավոն քահանա Ղեւոնդյանը ասում է, որ Հիսուս Քրիստոսի Ս. Ծննդյան և Աստվածահայտնության տոնը սկսվում է հունվարի 5-ի երեկոյան, քանի որ եկեղեցական օրը փոխվում է երեկոյան ժամերգությունից հետո` ժամը 17.00-ից. «Սուրբ Ծննդի տոնը սկսվում է ճրագալույցի Սուրբ պատարագով: Ճրագալույցը խորհրդանշում է բեթղեհեմյան աստղի լույսը, որն առաջնորդեց մոգերին դեպի Հիսուս Մանուկ: Ճրագալույցին վառվում են եկեղեցու ջահերն ու կանթեղները, եկեղեցի եկած մարդկանց վառվող մոմեր են բաժանվում, որից հետո մատուցվում է Սբ. Պատարագ: Սուրբ Ծնունդից առաջ մեկշաբաթյա պահքը լուծվում է այդ Ծննդյան պատարագով»:
Տեր Շմավոնի խոսքով, եկեղեցուց տուն բերված մոմերը պետք է վառվեն ընթրիքի ժամանակ, սակայն որքանով է դա այդպես, ինքը հաստատ չգիտի. «Մոմերը աստվածային լույսի, եկեղեցու օրհնության նշան են: Սակայն մարդկանց մեծ մասը այն տանելով տուն` դնում է իրենց դաշնամուրի կամ պահարանի գլխին»:
Քահանան նկատել է նաեւ, որ հաճախ մարդիկ այս տոնը շփոթում են Հիսուս Քրիստոսի հրաշափառ հարության հետ եւ ասում են` Քրիստոս հարյավ ի մեռելոց, օրհնյալ է հարությունը Քրիստոսի. «Դրանք տարբեր տոներ են»:
Արամ Արարատյան
