Aravot.am –ը պարբերաբար դժգոհություններ էր լսում այն մասին, որ մոտ 10-15 մեքենայատերեր չեն կարող դուրս բերել իրենց մեքենաները Լանջիկի անանցանելի հատվածից, որտեղ վերջիններս, այսպես ասած, պատանդ էին ընկել դեռևս երեկվանից ` ձնաբքի պատճառով:
Հենց նոր մենք տեղեկություններ ստացանք այն մասին, որ Լանջիկի փոթորկաշատ հատվածում այլևս կուտակված մեքենաներ չկան, քիչ առաջ դուրս է բերվել ամենավերջին մեքենան` Մերսեդես մակնիշի: Շիրակի մարզպետարանի տրասնպորտի բաժնի պետ Խաչատուր Խնձրցյանը Aravot.am-ին փոխանցեց, որ Շիրակի մարզին պատկանող այդ հատվածը մինչև Մաստարա այլևս բաց է, անցանելի:Աշխատանքեր են տարվում նաև մարզի մյուս դժվարանցանելի հատվածները բացելու ուղղությամբ, օրինակ Արթիկ-Պեմզաշեն հատվածը ամբողջությամբ մաքրելու, ինչպես նաև Աշոցքի մի քանի միջհամայնքային ճանապարհները բացելու ուղղությամբ: Նշենք, քանի որ Արագածոտնի մարզին պատկանող Մաստարայի հատվածը մաքրված չէ, հետևաբար որքան էլ Շիրակի մարզում գտնվող Լանջիկը դարձնեն անցանելի, մարդիկ չեն կարող մեքենաներով ու միկրոավտոբուսներով երթեկել դեպի մայրաքաղաք: Նրանք, լավագույն դեպքում, Գյումրու ավտոկայանից մայրաքաղաք են ուղևորվում Արմավիրի ճանապարհով: Նշենք, սակայն, որ ուղևորների մեծ մասը դեռ գնացքի հույսին են, երեկվանից գյումրեցիները մայրաքաղաք են ուղեւորվում ու հետ գալիս գնացքով, որտեղ, ըստ նրանց, ասեղ գցելու տեղ չկա:Այս տեսանյութում, որը մեզ է տրամադրել գյումրեցիներից մեկը, ակնհայտ երեւում է, թե ինչ վիճակ էր երեկ Գյումրի-Երեւան գնացքում եւ դրա շուրջ:
Ուղեւորներից մեկը`civilnet.am –ի քաղաքական մեկնաբան –լրագրող Դերենիկ Մալխասյանը Ֆեսբույքան իր էջում, պատմելով երեկ ժամը 18.00-ին Գյումրիից մայրաքաղաք գնացքով կատարած ճամփորդության մասին, գրել էր. «Գյումրի-Երեւան ուղեւորափոխադրությունը պարալիզված է, ավտոմայրուղին ձյան պատճառով անանցանելի է, գյումրեցիների դեպի Երևան տանող «կյանքի ճանապարհը» հնարավոր է անցնել միայն գնացքով… Իսկ երկաթուղային փոխադրամիջոցը նոր ռեկորդներ է սահմանում, գնացքում կանգնելու տեղ անգամ չկա,սակայն տոմսերը վաճառված են նստելատեղերից մի քանի անգամ ավելի: Այսինքն տոմսով հնարավոր չէ անգամ կանգնած հասնել Երեւան: Ահա այսպիսին է «ապահով Հայաստանը»:
Մեկ այլ օգտատեր էլ ` Մելիքսեթ Գաբոյանը, հավելել է «Ավելին,գնացքի միակ ”զուգարանը”, որը միայն` Բացվում և Օգտագործվում է, ՌԴ-ն գնացքում` ”ծառայողների” առջև է … Ոչ` Ուղևորների Համար … »:Մեկ այլ օգտատեր Մարատ Մ. Յավրումյան անուն-ազգանունով, հեգնել էր. «Նորմալ երկիր է, ինչ ես ուզում ,հաշտվի ու հանգիստ ապրի »:
Կարդացեք նաև
Նշենք, որ այսօր տեղեկություներ ստացանք նաև այն մասին, որ հունվարի 1-ից թանկացրել են գնացքի տոմսերը` Գյումրի-Արմավիրը 750-ից դարձել է 1000 դրամ, իսկ Գյումրի-Երևանը` 950-1000 դրամ:
Նունե ԱՐԵՎՇԱՏՅԱՆ
