Օրեր առաջ Կապանի Դավիթ Բեկ թաղամասի մոտակայքում ավտովթարի ենթարկված երիտասարդ վարորդի վիճակը շարունակում է մնալ միջին ծանրության: Ըստ Կապանի բժշկական կենտրոնի վնասվածքաբանական բաժանմունքի վարիչ Սարիկ Աթաջանյանի` երիտասարդը ստորին ծնոտի կրկնակի կոտրվածքով եւ գանգուղեղային տրավմայով էր հիվանդանոց տեղափոխվել: Ներկա պահին նրա կյանքին վտանգ չի սպառնում, բայց վիճակը շարունակում է մնալ միջին ծանրության: «Վարորդի հետ նաեւ զինծառայող է եղել: Նա Կապանի հիվանդանոց է տեղափոխվել անգիտակից վիճակում` գանգուղեղային համակցված բազմաթիվ վնասվածքներով, վիճակը ծանր էր: Վերջինս Կապանի հիվանդանոցից տեղափոխվել է Երեւան», – ասաց բժիշկ Աթաջանյանը: Մեր ունեցած տեղեկություններով` կապանցի վարորդը սթափ վիճակում չէր եւ վարորդական փորձ չուներ:
Մեքենան բախվել էր Դավիթ Բեկ թաղամասի հարակից կենտրոնական մայրուղու մայթեզրի էլեկտրասյանը, որի հետեւանքով մեքենայում գտնվող վարորդն ու զինծառայողը մարմնական տարբեր վնասվածքներով շտապ օգնության մեքենայով հունվարի 13-ին ժամը 04:30-ի սահմաններում տեղափոխվել են Կապանի բժշկական կենտրոն:
Մերի ՍՈՂՈՄՈՆՅԱՆ
