Սոցիալական ցանցերում, այլ լրատվամիջոցներում մեր գործընկերոջ՝ Նաիրա Մամիկոնյանի անժամանակ մահվան կապակցությամբ բազմաթիվ ցավակցություններին հավելենք եւս երկուսը, որ ստացել ենք մեր էլեկտրոնային հասցեով:
«Տեսակետ» մամուլի ակումբ. «Մեծ ցավով տեղեկացանք հրաշալի մարդու և փայլուն լրագրողի` «Առավոտ» օրաթերթի թղթակից Նաիրա Մամիկոնյանի անժամանակ մահվան մասին: Կյանքից հեռացավ կենսախինդ ու լուսավոր մի անձնավորություն, որի հետ երկու րոպե շփումն անգամ բավարար էր, որպեսզի վարակվեիր նրա լավատեսությամբ ու դրական լիցքեր ստանայիր ամբողջ օրվա համար: Նրան երբեք հանգիստ չէիր տեսնի` անընդհատ զբաղված, մշտապես վազքի մեջ. նրա ամենօրյա գործունեության մեջ դրսևորվում էին իսկական լրագրողի լավագույն հատկանիշները: Նաիրայի կորստով մեզանում պակասեցին լույսն ու բարությունը, որ հորդում էին մեծ սիրտ ունեցող այս աշխույժ ու պայծառ մարդուց: Սգալով Նաիրայի կորուստը` ցավակցում ենք նրա հարազատներին ու գործընկերներին: Աստված լուսավորի նրա հոգին:
Իր ցավակցությունն է Փարիզից հայտնել նաեւ լրագրող Ժան Էկյանը:
