Այսօր Գյումրու նորընտիր քաղաքապետ Սամվել Բալասանյանը իր 100 օրվա պաշտոնավարման առիթով հրավիրած մամուլի ասուլիսի ժամանակ խոսեց քաղաքի տարբեր խնդիրներից` Գյումրու փողոցներից, ռեվիզոր հրավիրել-չհրավիրելուց, ապօրինի շինություններից, Վարդան Ղուկասյանի կողմից պարտք-տալիքով քաղաքապետարանի համար կահույք գնելուց ու պարտքերը չտալուց և այսպես շարունակ:
Մոտ 2 ժամ տևած մամուլի ասուլիսի ժամանակ, Սամվել Բալասանյանին հարց ուղղվեց, թե ինքը պահո՞ւմ է ծառայողական մեքենա: «Էս գումարների պայմաններում ի՞նչ ծառայողական մեքենա, Աստծուն փառք, ես մեքենա ունեմ, մի հատ էլ չէ, 2 հատ էլ չէ, ունեմ, պրոբլեմ չունեմ: Ես ասել եմ, ոչ էլ էստեղից ինձ վառելանյութ է պետք, ասել եմ բենզինը ուրիշ տեղից կլցնեք իմ գումարներով: Ես ասել եմ, որ իմ աշխատավարձը փոխանցելու եմ հիմնադրամ, աշխատավարձ էլ չեմ վերցնելու: Պա՞րզ է , անկաշառ, թափանցիկ աշխատելու եմ: Ոչ մի աշխատավարձ չեմ ստացել, ոչ մի վառելանյութից չեմ օգտվել, ինձ էլ ծառայողական մեքենա պետք չէ»,- հայտարարեց քաղաքապետը:
Լրագրողները հետաքրքրվեցին` բա «Մոսկվի՞չը», որը երկու անգամ էլ որպես իր ունեցած միակ մեքենա հայտարարագրված է Սամվել Բալասանյանի ընտրատարածքային ընտրական հանձնաժողով ներկայացրած փաստաթղթերի մեջ: «Մեքենան օտարելու եմ, հիմա որ համարները հանձնեցի Ազգային ժողովին, օտարեմ, ես էդ շառից պրծնեմ», -ծիծաղեց պարոն Բալասանյանը:
Նունե ԱՐԵՎՇԱՏՅԱՆ
