Հունվարի 21-27-ն ընկած ժամանակահատվածում ՀՌԱՀ մոնիթորինգի խումբն արձանագրել է, որ «Ժառանգության» առաջնորդ Րաֆֆի Հովհաննիսյանն ամենից շատ է լուսաբանվել հեռուստաեթերում :
Այսօր լրագրողների հետ հանդիպման ժամանակ ՀՌԱՀ նախագահ Գրիգոր Ամալյանն ասաց, որ Հովհաննիսյանն ունեցել է 2160 անվճար եւ վճարովի եթերաժամանակ, իսկ ամենաքիչը հեռուստաեթերում երեւացել է նախագահի թեկնածու Արման Մելիքյանը՝ 503 րոպե:
«Մեկ շաբաթվա ընթացքում Արման Մելիքյանը ունեցել է միջինը 70 րոպե եթերաժամանակ, բայց սա կապված է նրա քարոզարշավին մասնակցելու ընտրությամբ, նա նախընտրում է քարոզչական պասիվ ճանապարհը»:
Պարոն Ամալյանը նաեւ ասաց, որ նախընտրական քարոզարշավի ընթացքում, նշված ժամանակահատվածում՝ հունվարի 21-27-ը հեռուստաընկերությունների եւ ռադիոընկերությունների կողմից խախտումներ չի արձանագրել: Իսկ ինչ վերաբերում է հեռուստաեթերի սակագների շուրջ դժգոհություններին, ՀՌԱՀ նախագահն ասաց, որ ուսումնասիրել են առաջարկվող սակագներն ու պարզել, որ դրանք համապատասխանում են ՀՀ ընտրական օրենսգրքին:
Կարդացեք նաև
Հանձնաժողովը նաեւ արձանագրել է, որ թեկնածուներին հրավիրելու հարցում հեռուստա եւ ռադիոընկերությունները այդ մեկ շաբաթվա ընթացքում խտրականություն չեն դրել, իսկ վճարովի եթերաժամից այդ ընթացքում օգտվել են դեռ երեք թեկնածուներ՝ Հրանտ Բագրատյանը, Սերժ Սարգսյանը եւ Րաֆֆի Հովհաննիսյանը: Իսկ բողոքներ, այս կապակցությամբ, հանձնաժողովը դեռ չի ստացել:
Արփինե ՍԻՄՈՆՅԱՆ
