Ըստ ուսումնասիրության` պատկերը փոխվել է քարոզարշավի ընթացքում
«Հենարան» ակումբում այսօր Երևանի մամուլի ակումբի նախագահ Բորիս Նավասարդյանը ներկայացրեց Հայաստանի հեռարձակվող ԶԼՄ-ների կողմից ՀՀ 2013թ. նախագահական ընտրությունների լուսաբանման մշտադիտարկման միջանկյալ հաշվետվությունը (2013թ. հունվարի 14 – փետրվարի 3): Հետազոտության «օբյեկտ» են հանդիսանում 6 համազգային հեռուստաալիք` «Հ1», «Հ2», «Արմենիա», «Երկիր Մեդիա», «Կենտրոն», «Շանթ», 1 մայրաքաղաքային հեռուստաալիք` «Արմնյուզ», ինչպես նաեւ` Հայաստանի հանրային ռադիոն եւ «Արմռադիոն»:
Նավասարդյանը նշեց, որ լուսաբանման ակտիվության առումով առանձնացել են «Արմնյուզը» եւ «Արմռադիոն». «Իսկ խորհրդարանական ընտրությունների համեմատ` ակտիվությունը նվազեցրել են «Երկիր Մեդիան» եւ «Կենտրոնը»: Հավանաբար, դա պայմանավորված է նրանով, որ տվյալ հեռուստաընկերությունների սեփականատերերը հստակ հետաքրքրություն չունեն ընտրարշավի շուրջ: Սա ինչ-որ տեղ մեր հեռարձակվող դաշտի ընդհանուր խնդիրն է, երբ սեփականատերերի մոտեցումը չի համապատասխանում սպառողների պահանջարկին»:
ԵՄԱ-ի նախագահը նշեց, որ հետազոտված լրատվամիջոցների կողմից հետաքրքրության առումով տարբեր էր մոտեցումը նախընտրական շրջանում եւ քարոզարշավի ժամանակ. «Օրինակ, հունվարի 14-25-ը Սերժ Սարգսյանը հիմնականում լուսաբանվում էր որպես նախագահ, այսինքն` քարոզարշավից առաջ նա տեղեկատվական առավելություն ուներ: Պատկերը փոխվեց հունվարի 21-ից հետո, երբ նա սկսեց լուսաբանվել առավելապես որպես նախագահի թեկնածու: Այդ գործում դեր ունեցան մեր եւ դիտորդների հորդորները»:
Կարդացեք նաև
Ինչ վերաբերում է Պարույր Հայրիկյանին, պարոն Նավասարդյանը նշեց, որ լուսաբանելու տեսանկյունից մեծ դեր խաղաց նրա հետ պատահած դեպքը. «Միայն փետրվարին նրան հատկացվեց անդրադարձների մոտ կեսը եւ եթերի 2/3-ը, ինչը բնական է»:
Թեկնածուների վերաբերյալ դրական ու բացասական հիշատակումների շուրջ բանախոսը հայտնեց, որ դրանք միաժամանակ դրսեւրվում էին գործող նախագահի հանդեպ. «Դրական կարծիքները հիմնականում տարբեր հաղորդումներում նրա անձի մասին հիշատակումներն են, իսկ բացասականները` տարբեր բանավեճերում հյուրերի կողմից նրա վերաբերյալ արտահայտած տեսակետերը»:
Նավասարդյանի խոսքով. «Ընդհանուր առմամբ հետազոտված լրատվամիջոցների լուսաբանումը չեզոք է, սակայն հիմնական թերությունը կարծիքների բախման եւ բանավեճերի պակասն է, որը մշտապես առկա է եղել»:
Լուիզա ՍՈՒՔԻԱՍՅԱՆ
