Ուլուբաբյանն ունի զոհվածների մահվան վկայականները
«Սումգայիթյան ջարդերի ժամանակ սպանվել է ոչ թե 32, ինչպես ներկայացնում են, այլ հարյուրից ավել հոգի, որոնց մահվան վկայականների լուսանկարները կան,-այսօր «Տեսակետ» ակումբում ասաց Սումգայիթում զոհվածների հարազատների վստահված անձ, «Сумгаит… Геноцид… Гласность?» գրքի համահեղինակ Հրայր Ուլուբաբյանը, ապա հավելեց,- Մոտ երկու տարի առաջ դատախազությունը հրապարակեց մահացածների ցուցակ, որում ես ուղղումներ էի մտցրել դեռեւս 1989թ-ին: Բանն այն է, որ ցուցակն ուներ անհամապատասխանություններ. ցանկում ընդգրկված էին կենդանի մարդիկ, որոնց ես ճանաչում եմ եւ այսօր էլ կարող եմ նրանց ներկայացնել»:
ՍԴ խորհրդական, Սահմանադրական իրավունքի կենտրոնի խորհրդի նախագահ Գևորգ Դանիելյանը նշեց, որ Սումգայիթում տեղի ունեցած դեպքերը որակվել են որպես խուլիգանական գործողություններ, մինչդեռ ջարդերը նախապես պլանավորված են եղել. «Դատավարությանը մասնակցել է երեք հայ փաստաբան, որոնք մեծ աշխատանք են տարել այդ ուղղությամբ: Սակայն նրանց միջնորդությունների 90 տոկոսը մերժվել է: Ընդհանուր առմամբ` դատավարությունը բաժանվել է մի քանի էտապի, ինչը նույնպես կազմակերպված էր: Սկզբում մահապատժի վճիռ կայացվեց Մամեդովի հանդեպ, սակայն տեղյակ չեմ` այն իրականացվեց, թե` ոչ»:
Դանիելյանի դիտարկմամբ. «Ներկայումս պարտադրել, որ Ադրբեջանը վերանայի քրեական գործերը, հնարավոր չէ: Նման կարգի հարցերում միջազգային դատարանները պետք է ներգրավվեն, որովհետեւ սա մարդկության հանդեպ կատարված հանցագործություն է»:
Կարդացեք նաև
Ուլուբաբյանի խոսքով. «Մինչ ջարդերը սկսելը նախապես կազմվել են մարդկանց ցուցակները: Գործողությունները տեւել են ոչ թե երեք, այլ չորս օր: Փետրվարի 26-ին ժողովրդին են ոտքի հանել, իսկ Ադրբեջանի կոնտկոմի ղեկավարը ներկա է եղել հավաքներին: Հայերի դեմ հնչել են կոչեր` «սպանել», «ջարդել», «հրդեհել», «դուրս հանել Ադրբեջանից»: Այդպես մեկ օր շարունակ ժողովրդին լարեցին հայերի դեմ: Հաջորդ օրը, երբ Սումգայիթը շրջափակված էր, դրսում ծեծ ու ջարդ իրականացնելով` սարսափի մեջ էին գցում հայերին, որպեսզի տներից դուրս չգան: Փետրվարի 28-ից արդեն մտան տները, մարդկանց հանեցին եւ հրապարակավ սպանեցին, այլանդակ բռնաբարություններ կատարեցին:Իսկ Սումգայիթ մտած զորքը հրաման ուներ չմիջամտել»:
Լուիզա ՍՈՒՔԻԱՍՅԱՆ
