Վերջին շրջանում հանրապետությունում բոտուլիզմից թունավորումների մասին շրջանառվող լուրերը նրան մտածելու տեղիք են տվել:
56-ամյա վանաձորցի Ալվարդ Բարխուդարյանն արդեն հստակ որոշել է եկող աշնանից պահածոներ չպատրաստել: Այդկերպ նա փորձում է իր 6 անձից բաղկացած ընտանիքը պաշտպանել տան պայմաններում պահածոյացված սննդամթերքի թունավորումներից:
«Վերջին շրջանում այնքան դեպքեր լսեցինք պահածոներից թունավորվելու մասին, որ արդեն որոշել եմ` ամռանն ու աշնանը կառնեմ, երեխեքը ինչքան կուզեն, կուտեն, ոչ մի բան չեմ փակելու, առողջությունն ավելի թանկ է»,-Aravot.am-ի հետ զրույցում ասում է նա` հիշելով, որ վերջերս բացած պահածոյացված կարմիր պղպեղից չի կերել անգամ ջերմային մշակման ենթարկելուց հետո: «Մերոնք կերան, եսч չէ, եռացրինք, բայց ես էլի չկերա, թոռնիկներիս էլ թույլ չտվի ուտեն»:
Կարդացեք նաև
Ինչպես մեզ հետ զրույցում նշում է ՀՀ Լոռու մարզպետարանի աշխատակազմի առողջապահության եւ սոցիալական ապահովության վարչության պետ Սամվել Լամբարյանը, այս տարվա ընթացքում Լոռու մարզում բոտուլիզմի 1 դեպք է գրանցվել` կարմիր պղպեղի պահածոյի օգտագործումից: «Նույն ընտանիքի անդամներ էին` մայրը եւ աղջիկները, մայրը մահացել է, 3 աղջիկների կյանքը հաջողվել է փրկել: Մայրն արդեն ծեր էր` 1921 թվականի ծնված, հավանաբար տարիքի գործոնը, ավելի թույլ լինելը, նաեւ ուշ դիմելն էր պատճառը, որ չկարողացանք մորը փրկել»: Նկատենք, սակայն, որ այսօր կեսօրից հետո առողջապահության նախարարությունը տեղեկացրեց, որ աղջիկներից մեկն էլ է մահացել:
Նա, սակայն, նկատում է, որ բոտուլիզմի դեպքերի աճ մարզում չի նկատվում:
Չնայած դրան` Սամվել Լամբարյանը խորհուրդ է տալիս խուսափել հատկապես այն պահածոներից, որոնք բացելուց հետո ջերմային մշակման ենթակա չեն: «Տան պայմաններում պատրաստված պահածոները միանշանակ պետք է ենթարկվեն ջերմային մշակման, նոր օգտագործվեն, քանի որ բոտուլիզմի հարուցիչները շատ արագ ջերմային մշակման դեպքում վերանում են, իսկ այն պահածոները, որոնք բացելուց հետո ջերմային մշակման ենթակա չեն, պետք չէ պատրաստել,պետք է զերծ մնալ նման պահածոներ պատրաստելուց»,-եզրափակում է նա:
Անուշ ԲՈՒԼՂԱԴԱՐՅԱՆ
