Այսօր ՀՀ գյուղատնտեսության նախարար Սերգո Կարապետյանն այցելել է Արմավիրի մարզ:
Գյուղնախարարության տարածած հաղորդագրության համաձայն, նախարարը նախ եղել է «Նոյան» բնական հյութերի գործարանում, ուր այսօրվանից մթերվում է մայիսի 12-ի կարկտահարության հետեւանքով ապրանքային տեսքը կորցրած ծիրանը:
Գյուղատնտեսության նախարարության եւ վերամշակող ճյուղի գործընկերային համաձայնության արդյունքում բնական աղետից տուժած արմավիրցիների բերքն առանց ավելորդ քաշքշուքի կշռվում եւ ընդունվում է:
Գյուղատնտեսության նախարարը այցելել է նաեւ Նոր Կեսարիա եւ Սարդարապատ գյուղեր: Կարկտահարության հետեւանքները մեղմելու նպատակով գյուղատնտեսության նախարարությունն Արմավիրի մարզպետարանին հատկացրել էր շուրջ 87 մլն դրամ արժողությամբ մշակաբույսերի սերմացու, որի արդյունքն արդեն տեսանելի էր: Նախարարը շրջեց ձմերուկի եւ սմբուկի արդեն ծլարձակած դաշտերում, անկեղծ զրույցի բռնվեց արմավիրցիների հետ, ովքեր պետական աջակցությամբ սերմացու ստանալուն պես կրկնացանք են կատարել:
