Այսօր Aravot.am-ի հետ զրույցում «Ժառանգություն» խմբակցության քարտուղար Զարուհի Փոստանջյանը վստահեցրեց, որ Կիպրոսի գլխավոր դատախազի հայտարարությունը նորություն չէ, քանի որ առանց այդ էլ ամեն ինչ պարզ է վարչապետի օֆշորային սկանդալի հետ կապված:
Հիշեցնենք, որ Կիպրոսի դատախազը «Ազատություն» ռ/կ-ին ասել էր, որ իրենց երկրում հնարավոր չէ օֆշորային ընկերության բաժնետեր լինել՝ առանց այդ անձի իմացության, կամ լիազոր ներկայացուցչի թույլտվության: Այդպես նա հերքել էր ԱԺ-ում վարչապետ Տիգրան Սարգսյանի բացատրությունները, թե ինքը որեւէ կապ չունի այդ ընկերության հետ, եւ որ Նիկոլ Փաշինյանի անունով էլ հնարավոր է գրանցվեն նման ընկերություններ՝ առանց նրա իմացության:
Զարուհի Փոստանջյանի խոսքերով՝ «ԱԺ-ում վարչապետի խոսքից էլ էր ամեն ինչ պարզ, որ նա չի ասում ճշմարտությունը: Մենք դա Կիպրոսի դատախազից չիմացանք, ուղղակի, ի տարբերություն մեր դատախազների, նա կատարել է իր պարտքը և ներակայացրել գործող օրենքի պահանջները` չունենալով շահ պաշտպանել կամ հովանավորել Տիգրան Սարգսյանին»:
Մեր հարցին՝ այն, որ Սերժ Սարգսյանն իր վերջին խորհրդակցության ժամանակ կշտամբեց գլխավոր դատախազին, այդ դիտողությունների տակ պե՞տք է նկատի ունենալ նաեւ, որ վարչապետն ու Կճոյանն անձեռնմխելի են եւ նրանց հետ այսպես ասած «գործ չունես»՝ Զարուհի Փոստանջյանը պատասխանեց. «Սերժ Սարգսյանի մոտ տեղի ունեցածը, որին տրվել է քննարկում բյուջետային միջոցների արդյունավետ կառավարման, իրականացվող պետական ծրագրերի հանդեպ վերահսկողության ուժեղացման եւ կոռուպցիոն ռիսկերի նվազեցմանը միտված հարցերի շուրջ անվանում, գլխավոր դերակատարի վատ բեմադրություն էր: Ընդհանրապես, եթե տեղի է ունենում քննարկում, որին մասնակցում են շուրջ երկու տասնյակ մարդ, ապա առնվազն մեկ տասնյակը պետք է կարողանա կարծիք արտահայտել, իսկ եթե այդ երկու տասնյակը բարձրաստիճան պետական պաշտոնյաներ են, մի երկրի, որը որպես կոռումպացված երկիր ԵԽ-ի 47 երկրներից գտնվում է խայտառակ «լավագույն» հնգյակում, ապա կոռուպցիայի մասին քնարկումները հնարավոր չեր իրականացնել մենախոսություն լսելու տեսքով»:
Կարդացեք նաև
Ես 9 տարի փաստաբան եմ եղել, որպես փաստաբան որոշակի փորձ ունեմ քրեական աշխարհի հետ շփման մեջ: Այդ «քննարկումներ» ասվածը ես, երբ դիտեցի` այնպիսի տպավորություն էր, որ հանցագործ աշխարհի մի խումբ մարդիկ հավաքվել են եւ նրանցից ամենաազդեցիկը` խմբի ղեկավարը, փորձ է կատարում խոսք ասել, որը կնմանակի մաֆիայի կնքահոր խոսքին: Խմբի ղեկավարը հաշիվներ էր պարզում իրեն ենթակա խմբի մի անդամից, փորձում էր ինչ-որ բաներ հասկացնել եւ´ ներկաներին, եւ´ այլոց, ցանկանում էր ոմանց հիշեցնել, որ ես եմ այստեղ որոշումներ կայացնողը, ես գիտեմ` այստեղ ով ձեզանից ինչ է ներկայացնում եւ ընթանրապես տեղակցված եմ ամեն ինչի մասին: Այսինքն, Սերժ Սարգսյանը հասկացրեց, որ ներկա գտնվողներից յուրաքանչյուրն իր ենթականերն են, ձեր նկատմամբ ունեմ համապատասխան կոմպրոմատներ եւ ընդհանրապես որոշումներ կայացնողը ես եմ: Կցանկանա՞մ՝ կասեմ դատախազը սկսի գործընթաց, չեմ ցանկանա՝ չեմ սկսի: Այս պահի դրությամբ հանձնարարությունս ոչ թե 700 միլիարդ յուրացմանն է վերաբերում, այլ թեթեւ` փոքր չափերի յուրացումներով եւ փոքր պաշտոնյաներով զբաղվեք, ոչ ավելին: Պետական պաշտոնյաների կողմից յուրացումների քանակի, չարաշահումների չափի, մեղադրանքների ծավալների մասին չի թույլտրվում ինքնուրույն հայտարարություններ եւ քննարկումներ անցկացնել: Քանակը, չափը, ծավալը պետք է ճշտել Սերժ Սարգսյանի հետ, եւ բացի այդ` ապագա բոլոր գործողությունների իրականացումը նույնպես: Այդ օրվա հավաքից այդպիսի տպավորություն ստացա:
Հռիփսիմե ՋԵԲԵՋՅԱՆ
