Երեկ ուսման վարձավճարների թանկացման դեմ պայքարող ուսանողների բողոքի ակցիան չկայացավ, քանի որ ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովում այդ թեմայով քննարկում էր ընթացել:
Aravot.am-ը ուսման վարձերի բարձրացման դեմ պայքարող ակտիվիստ, ԵՊՀ թուրքագիտության ֆակուլտետի առաջին կուրսի ուսանող
Գրիշա Էգերիձեից հետաքրքրվեց՝ ինչո՞ւ ի վերջո որոշեցին դադարեցնել բողոքի ակցիաները, չէ՞ որ ասում էին մինչեւ վերջ են գնալու:
«Ամեն անգամ, երբ վարձավճարների թանկացման դեմ պայքարող երիտասարդներով հավաքվում էինք Մաշտոցի պուրակում, անընդհատ կրկնում էինք, որ չենք ուզում, և ամենայն հավանականությամբ չենք գնա դասադուլի, որովհետև դա առաջին հերթին վնասում է առաջին կուրսեցուն, վնասում է այն առումով, որ դասապրոցեսներին չմասնակցելով, դեռ համալսարանը չտեսած` կհիասթափվեն, ու ետ կընկնեն դասապրոցեսի հիմնական ծրագրից: Հույս ու հավատ փայփայելով՝ բազմիցս դիմեցինք ԿԳ նախարար Արմեն Աշոտյանին, ՀՀ վարչապետ Տիգրան Սարգսյանին, բուհերի ռեկտորներին, և այլ շահագրգիռ անձանց:
Մինչ սեպտեմբեր իրականացրած ակցիաները արդյունք տվեցին այնքանով, որ սոցփաթեթների կիրառումից (եթե հավատանք Ա. Աշոտյանին), հնարավորություն կունենան օգտվելու նաև այս տարվա 1-ին կուրսեցիները: Իսկ ավելի արմատական պատճառը, որ որոշ ժամանակով դադարեցրինք բողոքի ակցիաները այն էր, որ առաջին կուրսեցիները հասցնեն ծանոթանալ համալսարանի հետ, դնեն իրենց ստանալիք գիտելիքների հիմքը հաջողությամբ: Այստեղ մնում է միայն սոցիալապես անապահովների հարցը, ովքեր վարձը չվճարելու դեպքում կհայտնվեն համալսարանից դուրս մնալու խնդրի առաջ: Նրանց ուղղակի կհորդորեմ համակերպվելու փոխարեն, բարձրացնեն իրենց ձայնը, չհուսալքվեն, որովհետև այն պայքարը, որը արդարացի է, կունենա հաջողություն»,-ասաց Էձգերիձեն:
Կարդացեք նաև
Հիշեցնենք, որ վերջերս ԿԳ նախարարը ընդունել էր կառավարության շենքի մոտ բողոքի ակցիա անցկացնող ակտիվիստներին, որոնց թվում էր նաեւ Գրիշա Էձգերիձեն: Երիտասարդը այն ժամանակ դժգոհ էր մնացել նախարարի հետ հանդիպման արդյունքներից:
Գոհար ՀԱԿՈԲՅԱՆ
Լուսանկարը՝ Գրիշա Էձգերիձեի ֆեյսբուքյան էջից
