Այդպես էլ չեն հայտնում խոզերի անկման պատճառը
«Առավոտի» թղթակցին է դիմել Տավուշի մարզի Իջեւանի տարածաշրջանի սահմանամերձ Վազաշեն գյուղի բնակիչ Հովիկ Ավագյանը: Նա հայտնեց, որ այս տարվա հուլիսի վերջին սատկել են իր խոզամայրը եւ 3 հատ 5 ամսական խոզ, որոնցից յուրաքանչյուրը 30 կգ քաշ ուներ: Նրա խոսքերով` 15 խոճկորով ծանրած խոզամայրը 5 օր հետո պետք է ծներ: Ավագյանի վկայությամբ ` գյուղապետարանի եւ Տավուշի մարզպետարանի աշխատակիցները եկել, տեսել, գրանցել են իր սատկած խոզերը, սակայն` ինքը ոչ մի աջակցություն չի ստացել: Հովիկ Ավագյանն ասաց, որ ինքը վիրավորվել է հայ-ադրբեջանական հակամարտության ժամանակ, սակայն դա եւս պատկան մարմինների կողմից անտեսվել է: Իր խոսքերով` 2000 դոլարի վնաս կրած Հ. Ավագյանը եւ եւս 15 վազաշենցի նամակ են գրել կառավարությանը, պահանջելով փոխհատուցում աֆրիկյան ժանտախտից սատկած խոզերի համար:
Վազաշենի գյուղապետ Լորիկ Բադիրյանն ասաց, որ ինքը գյուղում անկված 150 խոզերի ակտ է ներկայացրել կառավարություն, որից հետո գյուղում եւս 30 խոզ է սատկել: Գյուղապետն ասաց, որ ինքը խոզերի անկման հարցով դիմել է գյուղատնտեսության նախարարին, սակայն մերժողական պատասխան է ստացել: Բադիրյանն ասաց, որ պաշտոնապես չեն հայտնում, թե գյուղի խոզերը աֆրիկյան ժանտախտի՞ց, թե՞ մեկ այլ հիվանդությունից են սատկել, ինքն էլ արդեն հոգնել է սույն խնդիրը կառավարությանը ներկայացնելուց:
Ոսկան ՍԱՐԳՍՅԱՆ
