Այսօր խորհրդարանում 2014 թվականի բյուջեի նախագծի քննարկման ժամանակ ՀԱԿ խմբակցության պատգամավոր Նիկոլ Փաշինյանն Արարատի մարզի նորանշանակ մարզպետից հետաքրքրվեց, թե ինչո՞ւ է Արարատի մարզում, որտեղ մի շարք մեծահարուստներ հողագործության արդյունքում միլիոններ են վաստակում, աղքատության ցուցանիշը բարձր 39 տոկոսից:
Պատգամավորը սեփական վերլուծություններն արեց` եթե մեծահարուստը մարզի բերրի հողերից այդքան շահույթ է ստանում, ինչո՞ւ նույնը չի կարողանում անել հասարակ գյուղացին: Ապա Փաշինյանը հորդորեց, որ Արարատի մարզպետ Արամայիս Գրիգորյանը որպես գործարար պատասխանի այդ հարցին:
«Նախ, ես արդեն բիզնեսով չեմ զբաղվում»,- ասաց մարզպետն ու հավելեց, որ Փաշինյանը ճիշտ է, մարզում իրոք այդ իրավիճակն է. «Հողաբաժանման ժամանակ մարդկանց բաժին են հասել չնչին հողակտորներ: Մեծ տնտեսվարողների գերշահույթը բնական է, որովհետև մեծ կտորներից շահույթն ավելի է, իսկ փոքր հողակտորների վրա մարդիկ չեն կարողանում լիարժեք իրենց հնարավորությունները իրականացնել»:
Ի դեպ, մինչ Արամայիս Գրիգորյանը կներկայացներ իր հատվածը, նիստը վարող ԲՀԿ-ական պատգամավոր Ստեփան Մարգարյանն ասաց, որ հարցեր տալիս պատգամավորները նկատի առնեն, որ Արարատի մարզպետը նոր մարզպետ է եւ հին բաներից շատ չհիշեն: Երբ Նիկոլ Փաշինյանը հարցի իրավունք խնդրեց`Արամայիս Գրիգորյանը փորձեց հումոր անել. «Պարոն Փաշինյան, Ձեզ չասացի՞ն, որ ես նոր մարզպետ եմ»:
Նելլի ԳՐԻԳՈՐՅԱՆ
Ժողովուրդ ջան Արարատի ոչ նորանշանակ մարզպետը, ոչ էլ հին մարզպետները Արարատի մարզում ոչինչ չեն կարող փոխել, քանի էդ մարզում կա Հովիկ Աբրահամյանն ու իր բանդան: