Հունվարի 19–ի լույս 20–ի դեպքերը, ինչպես նաև թշնամու այլ նմանատիպ գործողությունները, նպաստում են, որ ազգի մոտ առաջանա «մենք»-ի զգացողություն։
Այդ ցավը յուրաքանչյուրն ընդունել է որպես անձնական։ Այս մասին այսօր հայտնեց հոգեբան Կարինե Նալչաջյանը՝ « Զարկերակ» մամուլի ակումբում կայացած ասուլիսի ժամանակ։
Ըստ նրա՝ այդ դեպքերի լուսաբանումը շատ ճիշտ կատարվեց։ Կ. Նալչաջյանի խոսքերով՝ այդ լուսաբանումը կարելի է անվանել « խրամատային լուսաբանում», քանի որ այդ լուսաբանման շնորհիվ շատ մարդիկ տեսան, թե ինչ է խրամատը , ինչ կահավորում ունի։ Սա դրական էր այն առումով , որ կանխեց իրականությունից հեռու ենթադրությունների առաջացումը։
Ըստ Կ. Նալչաջյանի՝ այս դեպքերը, իհարկե, առաջացնում են տագնապի և վախի զգացողություն, և ամենից առաջ այն ծնողների մոտ, որոնց զավակներն այժմ ծառայում են բանակում։
Կարդացեք նաև
Ինչ վերաբերում է զինվորներին, ապա Կ. Նալչաջյանի պնդմամբ, դիրքերում, մոտավորապես 3-րդ հերթափոխից հետո, զինվորների վախի զգացողությունը թուլանում է՝ զինվորները ադապտացվում են նոր իրավիճակին։
Կ. Նալչաջյանը նշեց նաև, որ զորամասերում աշխատում են հոգեբաններ, որոնք հոգեբանական աշխատանքներ են տանում զինվորների հետ։
Զառա ԱՍԿԱՐՅԱՆ