«Այսօր օրս սկսվեց լավ, ամեն ինչ նորմալ էր ընթանում: Դպրոցում արտասանեցի հորս նվիրված բանաստեղծությունը, արժանացա գովեստի ուսուցիչների կողմից: Շատ ուրախ էի, որ ուսուցիչները ջերմ խոսքեր ասեցին ինձ: Ինձ թվում էր, որ իմ ամենաերջանիկ օրերից է: Բայց դասերի վերջում դպրոցի Մայոր Գրիգորյանի կողմից, ռազմագիտության առարկայի ժամանակ ենթարկվեցի ծեծի»,-երեկ երեկոյան այս բովանդակությամբ գրառում է տեղադրել Շանթ Հարությունյանի որդին` Շահեն Հարությունյանը:
Գրառումից պարզ է դառնում, որ ծեծի հիմնական պատճառը եղել է այն, որ Շահենը առարկել է ուսուցչի այն պնդումներին, թե «մենք երբեք անկախ չենք եղել, չենք ու չենք լինի, և լավ է, որ այդպես է, քանի որ առանց Ռուսաստանի կյանք չենք կարող ունենալ, որ մեր ֆիդայինները, որ զոհվել են, ապարդյուն է եղել, որ ռուսը մեր «պապան» է, մենք ստրուկ ենք, առանց Ռուսաստանի Հայաստան գոյություն ունենալ չի կարող»:
Շահենը պատմում է, որ «մոտեցավ, ուժեղ հարված հասցրեց դոշիս: Ես ոտքով հարվածեցի նրան: Նա նույնպես ոտքով հարվածեց ինձ, ես էլ աթոռով հարվածեցի գլխին: Եթե չհարվածեի, սպանելու էր ինձ: Հարվածեցի ու դուրս եկա դասարանից: Բոլոր աշակերտները շոկի մեջ էին: Իսկ հետո ասեցին ինձ, որ իմ դուրս գալուց հետո մայորը փորձել է վարկաբեկել ինձ, ասելով, որ ես հակահայկական ոգի եմ սերմանում: Վերադարձա տուն:
Հ.Գ.Այս գրառումը վաղը առավոտյան հանձնելու եմ տնօրենին»:
Կարդացեք նաև
Aravot.am-ը պարզաբանումներ ստացավ Կ. Դեմիրճյանի անվան թիվ 139 դպրոցի տնօրեն Երվանդ Սարգսյանից: Նա փոխանցեց հետևյալը. «Նրանք երկուսն էլ բողոքով դիմել են ոստիկանություն, հիմա այնտեղ կպարզվի, թե ով է մեղավոր: Հոդվածում հստակ գրված է, որ ես այդ ժամանակ խորհրդակցության եմ եղել, նրանք թողել գնացել են, առավոտյան եմ իմացել, հիմա այդ հարցով կզբաղվեմ»:
Պարոն Սարգսյանն ասաց, որ Շահենը դեռ իրեն ոչ մի նամակ չի տվել: Մեր հարցին` արդյոք նման խնդիրներ ծագե՞լ են Շահենի և ուսուցչի միջև նախկինում, տնօրենը պատասխանեց. «Շահենը մեր դպրոց ընդամենը նոյեմբերից է եկել: Ընթացքում էլ դասարանը փոխել է: Առանձին բացասական արտառոց բաներ չեմ տեսել: Ուսուցչի հետ կախված էլ խնդիր չեմ տեսել»:
Հետաքրքրվեցինք` այդ ուսուցիչը լա՞վ աշխատող է, տնօրենը պատասխանեց. «Նորմալ»: Իսկ գործի ընթացքի մասին ասաց. «Դա ոստիկանության աշխատանքն է, այդ մասին ոչ մի բան ասել չենք կարող»:
Տաթև ՀԱՐՈՒԹՅՈՒՆՅԱՆ
Հ. Գ. ՀՀ ոստիկանության պաշտոնական հաղորդագրությունը կատարվածի վերաբերյալ. «Փետրվարի 4-ին, ժամը 19.55-ին, ոստիկանության Նոր Նորքի բաժին է դիմել 1957 թ. ծնված Հրաչյա Գ.-ն և հաղորդում տվել, որ նույն օրը, ժամը 14.05-ի սահմաններում, թիվ 139 ավագ դպրոցի աշակերտներից մեկը` 1999 թ. ծնված Շ. Հ.-ն, զինպատրաստության դասասենյակում աշակերտական աթոռով հարվածել է իր գլխին և պատճառել վնասվածք:
Նույն օրը, ժամը 21.30-ին, Շ. Հ.-ն ոստիկանությունում հաղորդում է տվել, որ ժամը 14.00-ի սահմաններում, թիվ 139 ավագ դպրոցի ռազմագիտության դասարանում զինղեկ Հրաչյա Գ.-ն ձեռքով երկու անգամ հարվածել է իր կրծքավանդակին և պատճառել ֆիզիկական ցավ: Նշանակվել են դատաբժշկական փորձաքննություններ»:
