«Պատահական չէ, որ ընդդեմ պարտադիր կենսաթոշակային համակարգի երթը այսօր սկսում ենք ԿԳ նախարարության շենքի մոտից: Պատճառն այն է, որ դպրոցներում և մանկապարտեզներում տոտալ ճնշումներ են իրականացվում աշխատակիցների նկատմամբ, որոնց պարտադրում են ընտրել կենսաթոշակային ֆոնդերը, թեև օրենքը կասեցված է և դրա իրավունքը չկա: Ուստի մեր ուղերձը ուղղված է նաև ԿԳՆ-ին»,-այսօր լրագրողների հետ հանդիպմանը հայտարարեց «Դեմ եմ» նախաձեռնության անդամ Դավիթ Խաժակյանը: Նա նաև տեղեկացրեց, որ բոլոր նախարարություններին, ՊԵԿ-ին նամակներ են ուղարկել՝ կապված ճնշումների հետ, բայց դեռ պատասխան չեն ստացել: Ըստ Դավիթ Խաժակյանի՝ ստացել են ՀՀ Ֆինանսների նախարարության պատասխանը, որն ըստ «Դեմ եմ» նախաձեռնության անդամի՝ «իր ոճով չի առանձնանում»:
Հարցին՝ արդյոք այնպիսի տպավորություն չի՞ ստեղծվում, որ իշխանությունն էլ տեղյակ չէ, թե ինչ է կատարվում, դա են վկայում, օրինակ` սոցապնախարարի հայտարարությունները, «Դեմ եմ» նախաձեռնության անդամ, իրավաբան Գևորգ Հայրապետյանն այսպես արձագանքեց. «Այնպես ուրախ կլինեմ, որ այդ կասկածը իրականանա, քանի որ որևէ մեկը չպետք է իմանա, թե ՍԴ-ն ինչ որոշում է կայացնելու: Շատ լավ է, որ պաշտոնյան չի կարողանում հստակ պատասխան տալ, ինչպես բրուտագործը, ատաղձագործները, նա ևս պետք է անհամբերությամբ սպասի ՍԴ որոշմանը և դրանից հետո նոր հայտարարություններ անի»:
Aravot.am-ը համատարած ճնշումների մասին գրավոր հարցում ուղարկեց ԿԳ նախարարություն՝ պարզելու արդյո՞ք ճնշումներից գերատեսչությունում տեղյա՞կ են և ինչպե՞ս են վերաբերում «Դեմ եմ» նախաձեռնության անդամների երթի՝ ԿԳ նախարարության մոտից մեկնարկին ու հիմնական ուղերձի՝ նախարարությանն ուղղված լինելունը: ԿԳ նախարարությունից պատասխան դեռ չեն ստացել, խոստացան, որ կպատասխանեն առաջիկայում:
Կարդացեք նաև
Տաթև ՀԱՐՈՒԹՅՈՒՆՅԱՆ
