Ըստ ՄԱԿ-ի վիճակագրության՝ աշխարհում ամեն տարի 3 կնոջից 1-ը ենթարկվում է բռնության: Այս թիվը կազմում է 1 միլիարդ: Աշխարհի տարբեր երկրներում կանայք փետրվարի 14-ին ոտքի են կանգնում և պարում: Նման միջոցառումների շարք տեղի է ունենում ամբողջ աշխարհով մեկ: Այս տարի բացառություն չկազմեց նաև Հայաստանը: Կազմակերպիչներից մեկի՝ Լիդա Մինասյանի խոսքերով՝ սա ամենահաջողված ակցիաներից մեկն է աշխարհում, հենց փետրվարի 14-ին, որը V-Dayն է: Աշխարհի բոլոր անկյուններում կազմակերպվում է այս ֆլեշմոբը: Միջոցառման ժամանակ կանայք պարում են՝ իրենց ձայնը բարձրացնելով բռնությունների դեմ:
Լիդան նաև հավելեց. «Մեր մասնակիցները հիմնականում ակտիվիստներ են, որոնք ցանկանում են իրենց ներկայությունով բարձրացնել կանանց իրազեկվածությունը այս խնդրի շուրջ: Մենք կանանց կոչ ենք անում կանգնել ոտքի՝ իրենց իրավունքների համար: Քանի որ այս միջոցառումը նոր է, այն դեռ միայն Երևանում է արվում, բայց հույս ունենք այն կազմակերպել նաև Հայաստանի բոլոր անկյուններում: Այժմ հետաքրքրվածությունը մեծ է, դա շատ կարևոր է և ոգևորող»:
Ակտիվիստները նախօրոք բեմադրում են պարը և փորձում:
Միջոցառման ժամանակ ակտիվիստներից ոմանք շրջում էին պաստառներով, որոնց վրա գրված էին կանանց բռնության դեմ կոչեր:
Կարդացեք նաև
Ակտիվիստներից Ռիմա Սողոմոնյանը նշեց. «Առաջին անգամը չէ, որ մասնակցում եմ ֆլեշմոբերին, սակայն սա աննախադեպ էր նրանով, որ կոչ է արվում կանանց իրազեկվածության մասին»:
Լիլիթ ՀԱՐՈՒԹՅՈՒՆՅԱՆ
