Այսօր «Տեսակետ» մամուլի ակումբի հյուրերն էին Գյուրջիևի անվան անսամբլի հիմնադիր և գեղարվեստական ղեկավար Լևոն Իսկենյանը, քամանչահար Արմեն Այվազյանը և սանթուրահար Վլադիմիր Պապիկյանը: Համույթը մասնակցելու է Բելգիայի Բրյուսել քաղաքի «Բոզար» մշակութային կենտրոնում անցկացվող Կովկասյան մշակութային օրերին:
«Միջոցառումը հատկապես կենտրոնացած է հայկական և վրացական մշակույթների վրա: Փետրվարի 22-ին մենք ունենալու ենք համերգ, որի ժամանակ հնչելու են բացառապես Գյուրջիևի ստեղծագործությունները: Համերգից առաջ լինելու է նաև հանդիպում անսամբլի երաժիշտների հետ, որպեսզի ներկայացվի հայ երաժշտությունը, կապը Գյուրջիևի և հայ երաժշտության, Կոմիտասի երաժշտության հետ»,- ասաց անսամբլի հիմնադիր և գեղարվեստական ղեկավար Լևոն Իսկենյանը:
Նա նաև նշեց, որ հանդիպման ժամանակ ներկայացվելու են դուդուկը, բլուլը, թառը, ուդը, քամանչան, սանթուրը, դափն ու քանոնը՝ որպես ժողովրդական նվագարաններ: «Եվ սա հիանալի առիթ է, որ մենք նաև Գյուրջիևի ճանապարհով ապագայում կարողանանք լսարանը բերել դեպի Կոմիտասի երաժշտություն, դեպի հայ աշուղական երաժշտություն»,- ասաց պրն Իսկենյանը:
Այնուհետև խոսեց Գյուջիևի ստեղծագործությունների մասին: Նա ասաց, որ երաժիշտ և փիլիսոփա Գյուրջիևն ունի 300-ից ավելի դաշնամուրային ստեղծագործություն: Եվ մինչ նրա ստեղծագործությունները մշակելը, նա նախ ծանոթացել է նրա ուսմունքին, փիլիսոփայությանը, որպեսզի ճիշտ հասկանա նրա ստեղծագործությունները:
Քամանչահար Արմեն Այվազյանը նշեց, որ մինչ համույթի ձևավորվելը ինքը ծանոթ չի եղել Գյուջիևի ստեղծագործությունների հետ, իսկ լսելուց և ուսումնասիրելուց հետո իր համար բացահայտումներ է արել: Խոսելով կատարողականի մասին՝ պրն Այվազյանն ասաց, որ այդ առումով այնքան էլ բարդ չէ. «Գյուրջիևի ստեղծագործություններն այնքան էլ դժվար չէ կատարել, զգալն է դժվար»:
Իսկ սանթուրահար Վլադիմիր Պապիկյանն ասաց, որ այժմ նրանք աշխատում են Կոմիտասի ստեղծագործությունների վրա:
Խոսեցին նաև հետագա ծրագրերի մասին: Պրն Իսկենյանն ասաց, որ հունիսին համերգներ են ունենալու Շվեյցարիայում, իսկ հուլիսին՝ Գերմանիայում, որտեղ մասնակցելու են ժողովրդական երաժշտության վրա կենտրոնացած փառատոնի:
Վարդուհի ԲԱԼՅԱՆ
