Մարտի 2-ին Ծաղկաձորի Կեչառիս վանական համալիրի բակում տեղի ունեցավ Համահայկական ձմեռային առաջին խաղերի փակման հանդիսավոր արարողությունը, որին ներկա էին Ազգային ժողովի նախագահ Հովիկ Աբրահամյանը, բարձրաստիճան անձինք, մարզասերներ: Հիշեցնենք, որ Համահայկական ձմեռային առաջին խաղերը մեկնարկել են փետրվարի 24-ին: Ձմեռային առաջին խաղերին մասնակցել է 11 պետության 22 քաղաքի մոտ 400 մասնակից: Խաղացանկում ընդգրկված մարզաձեւերից երեքը` դահուկ, լեռնադահուկ եւ սնոուբորդ անցկացվել են Ծաղկաձորում, իսկ հոկեյի մրցաշարը` Երեւանում: Մասնակիցները 7 օր շարունակ պայքարել են 39 մեդալների եւ մեկ գավաթի համար:
Հաղթողներին մեդալները հանձնեց Ազգային ժողովի նախագահ Հովիկ Աբրահամյանը: Ողջունելով ներկաներին եւ մասնակիցներին` խորհրդարանի ղեկավարը կարեւորեց համահայկական խաղերի անցկացումը եւ նշեց, որ մարզական այս մեծ միջոցառումը միավորում է հայերին աշխարհի տարբեր անկյուններից` ամրապնդելով Հայաստան, Արցախ եւ Սփյուռք եռամիասնությունը:
Ազգային ժողովի նախագահ Հովիկ Աբրահամյանը շնորհակալություն հայտնեց Համահայկական խաղերի համաշխարհային կոմիտեի նախագաh Իշխան Զաքարյանին, համահայկական խաղերի կազմկոմիտեին, բոլոր մասնակիցներին եւ կազմակերպիչներին: Եւս մեկ անգամ շնորհավորելով մրցաշարերի հաղթողներին` Հովիկ Աբրահամյանը Համահայկական ձմեռային առաջին խաղերը հայտարարեց փակված:
ԱԺ
Մամլո հաղորդագրություն
