Մարտի 3-ին ԱԺ տարածքային կառավարման եւ տեղական ինքնակառավարման հարցերի մշտական հանձնաժողովը Ստեփան Մարգարյանի նախագահությամբ տեղի ունեցած նիստում քննարկեց հանրապետությունում համայնքների խոշորացման վերաբերյալ կառավարության մոտեցումները:
Ստեփան Մարգարյանը տեղեկացրեց, որ կառավարությունն արդեն ընտրել է համայնքների խոշորացման վերաբերյալ մոդելները: Մշակվում է հայեցակարգ, որը առաջիկայում կներկայացվի խորհրդարանի քննարկմանը:
Ստեփան Մարգարյանի տեղեկություններով, համայնքների խոշորացման վերաբերյալ հարցին համայնքապետերի, ինչպես նաեւ տեղական բնակչության կարծիքները միանշանակ չեն. մասնավորապես համայնքապետերը դժգոհություններ ունեն: Իսկ թե ինչ են մտածում այս առնչությամբ համայնքների բնակիչները, ինչ մտահոգություններ ու առաջարկներ ունեն, հանձնաժողովը կփորձի պարզել առաջիկա ամիսներին նախատեսված արտագնա այցերի ընթացքում:
ԱՄՆ Միջազգային զարգացման գործակալության կողմից ֆինանսավորվող «Հայաստանի Ազգային Ժողովին աջակցման ծրագրի» փորձագետ Վահան Մովսիսյանը հանձնաժողովին ներկայացրեց ՀՀ կառավարությունում քննարկվող՝ «Փնջային» եւ «Շրջանային» անվանումներն ստացած մոդելները, դրանց առանձնահատկություններն ու միջազգային փորձը, ներդրման արդյունքում սպասվելիք արդյունքները: «Փնջային» մոդելը մատուցվող ծառայությունների քանակի եւ աշխարհագրության ընդլայնումն է, ներկա պահին օրենքով ամրագրված պարտադիր լիազորությունների ամբողջ (հիմնական) ծավալի իրականացումը: «Շրջանային» մոդելը ընդգրկում է «փնջային» խոշորացումն ամբողջությամբ եւ ներառում է մեկ կամ մի քանի փնջեր `հնարավորություն տալով համայնքներին փոխանցելու նոր լիազորություններ: Մոդելների ընտրության ժամանակ հաշվի են առել աշխարհագրական եւ ռելիեֆային յուրահատկությունները: Կառավարությունը այժմ մշակում է փնջային խոշորացման հայեցակարգը, իսկ շրջանային խոշորացումը, ըստ կառավարության, դեռ վաղ է :
Հանձնաժողովի նախագահ Ստեփան Մարգարյանը տեղեկացրեց, որ այս, ինչպես նաեւ այլ հարցերի կապակցությամբ գարնանային նստաշրջանի ընթացքում կկազմակերպվեն խորհրդարանական լսումներ եւ քննարկումներ:
Կարդացեք նաև
Քննարկվեցին նաեւ հանձնաժողովի աշխատանքին վերաբերող այլ հարցեր:
Մամլո հաղորդագրություն
